【女生最大煩惱】明明啱啱先食飽但又突然間好想食某一種食物？ 小編教你5種方法緩解「情緒性飢餓」

有冇試過食飽飯一陣，就有一種突如其來嘅飢餓感，完全不受控制咁好渴望某一種食物，直頭侵佔你成個思緒，冇辦法專心做手頭上嘅工作？其實有唔少女生都被呢種「情緒性飢餓」影響，小編有時做做下嘢都會好想食啲平日唔鍾意食嘅食物，特別係一啲高熱量嘅零食，例如朱古力。

呢種「情緒性飢餓」對於想控制體重嘅女生們真係一大敵人，小編而家就教大家5種方法去對抗呢種超邪惡嘅食欲！

但小編都要提提大家，唔好過份節食去減肥啊，要適當攝取足夠嘅營養！

方法1. 當你突然之間好想食某一種食物，而你知道自己只係為食，並非肚餓嘅時候，即刻離開所在嘅環境，最好去到戶外行15分鐘。

方法2. 比自己15分鐘，遠離食物，去刷個牙，徹底咁清潔你嘅口腔，越麻煩越好！咁就可以有效咁大大降低食欲。

方法3. 睇下你想食嘅食物上面貼有嘅營養標籤，望下入面有幾多防腐劑同添加劑，諗下食咗落肚對身體會有啲咩負面影響。

方法4. 血清素水平太低嘅時候其實都會令你嘅食欲比平日更大。呢排成日WFH都冇辦法吸收下出面嘅新鮮空氣，其實曬下太陽係有助提升血清素水平，從而降低食欲！

方法5. 如果冇辦法或者唔想離開屋企，可以即刻做5分鐘嘅運動，例如開合跳呢啲屋企都做到嘅簡單運動。