【品嚐地道風味】中環印度餐廳研究不一樣食譜 自家製特色蜜糖蝦咖喱

香港嘅印度餐廳提供嘅食物都係大同小異，Butter Chicken呢款咖喱相信都係香港人去到印度經常會叫，因為冇咁辣同易入口，但食得多都會想試下其他款嘅咖喱，不過又會怕太重香料味唔啱自己口味。

位於中環半山摩羅廟街嘅Papa Gomes就研究出一啲啱香港人口味嘅咖喱同菜式，例如印度版嘅煲仔飯。同時佢哋亦都會提供正宗嘅印度菜，比大家更多嘅選擇。

當中小編最推薦就係加入咗蜜糖同薑炮製嘅Honey Touched Prawn Curry，味道帶小小甜同唔會過辣，配上爽口彈牙嘅蝦肉同Naan一齊食真係超正！

佢哋嘅Chicken Biryani係用咗極具香港特色嘅煲仔上，除咗加入香港本土元素之外，呢種方式更令Biryani一直保持住溫度，小編食到最後個飯都仲熱！除咗溫度上控制得好，Biryani十分足料，雞肉同飯嘅份量十足，二人份量嚟講價錢算好親民！

飲品方面佢哋都有唔少充滿特色嘅選擇，例如Mango Lassi同Masala Tea。Mango Lassi質地濃稠，味道係芒果乳酪，小朋友一定會鍾意飲！女生們如果怕太飽可以兩個人Share一杯。

Papa Gomes

地址：半山摩羅廟街31-37號樂欣大廈地鋪