【周末Netflix推介】精選5套犯罪紀錄片！感情欺騙、世紀懸案、人性醜惡、網絡追捕同恐怖室友 案件曲折離奇、耐人尋味！
請Like我哋個Page：
相信唔少Netflix用戶，平時都會煲劇娛樂下，覺得劇本引人入勝。但係有冇諗過Netflix嘅紀錄片，都一樣曲折離奇、耐人尋味呢？ 今日小編精選咗五部犯罪紀錄片，每一部都係真人真事，每個案件都好峰迴路轉！除咗案件懸疑吸引之外，紀錄片嘅切入、剪接同拍攝手法，絕對可以媲美電影級製作！相信能夠完整而且清晰咁將事件嘅前因後果呈現畀觀眾！
1.《Tinder詐騙王》(The Tinder Swindler) 2022
 |
| 圖片來源：Netflix |
Netflix日前上架嘅犯罪紀錄片《Tinder詐騙王》，一直排喺香港排行榜嘅高位！喺呢個網絡發達嘅年代，好多男男女女都透過交友App認識新對象，物色唔同對象就向左滑，有興趣發展就向右滑，又快又簡單！一名叫「Simon」嘅富二代喺交友App上面嘅相，衣著打扮光鮮，家族背景仲好顯赫，係以色列鑽石大亨嘅仔。佢喺Tinder上結識唔少女性，利用完美形象同風趣健談嘅性格令對方身陷喺佢嘅魅力之中。但係當女性迷失喺呢場情場遊戲之中，又點會估到呢個完美「鑽石王子」，竟然係惡名昭彰嘅「Tinder 大騙徒」，專職詐騙年輕女性嘅金錢，涉及數以百萬計美元。
《Tinder詐騙王》搵嚟三位受害人以第一身講述受騙嘅來龍去脈，從佢地喺Tinder認識呢位「軟飯王子」，到墮入騙局，最後聯手反擊。成套紀錄片清晰而且全面咁呈現事件嘅過程同受害人嘅內心世界。
2.《犯罪現場：賽西爾酒店失蹤事件》2021
 |
| 圖片來源：Netflix |
2013年，一單世紀謎團震撼全香港人。一名香港移民加拿大嘅女子-藍可兒（Elisa Lam），喺佢獨自去洛杉磯旅行嘅時候失蹤，佢嘅家人喺失去聯絡多日後決定報警。但警方調查多日仍然冇下落，而且調查顯示藍可兒冇離開過賽西爾酒店（The Cecil Hotel）。 洛杉磯警方發佈藍可兒嘅最後影像係位於電梯入面，從監視器中見到佢動作詭異，影像亦有被剪接或者加工嘅痕跡。令一眾市民聯想到去各種靈異事件同陰謀論。而最後藍可兒嘅屍體被發現喺酒店頂樓嘅水塔入面，而且是正面向上，更加為成單案件更加懸疑。
《犯罪現場：賽西爾酒店失蹤事件》搵嚟當年嘅酒店經理、工作人員、住客同警員現身說法，仔細咁睇各種蛛絲馬跡，最後揭開真相，解釋各種網絡上的推測。
3.《虎王》(Tiger King) 2020
 |
| 圖片來源：Netflix |
2020年一套七集嘅紀錄片 - 《虎王》引起一眾熱話，更成為當年Netflix嘅人氣影集之一，當中最震撼人心嘅就係紀錄片中呈現人性中嘅陰暗面。《虎王》講述人稱「虎王」嘅異國喬 Joe Exotic，佢留咗奇特嘅狼尾頭髮型，持有槍械同有兩位同性伴侶。喺美國奧克拉荷馬州開設私人動物園，飼養同繁殖犬科同貓科大型動物，包括豹、虎、獅、獅虎等等，呢類動物被稱為「異國動物」（Exotic animal）。不單止經營動物園，以動物為遊客提供娛樂，仲會私下買賣貓科大型動物。因為咁而同「大貓救援」組織嘅領導人卡蘿・巴斯金 （Carole Baskin）結怨，互相提告。最後異國喬被判賠償100萬美金，但係因冇錢交出罰金而買兇殺害卡蘿・巴斯金未遂。但卡蘿・巴斯金亦都被指控同前夫失蹤事件有關同假借動保之名剝削勞工。
4. 《貓不可殺不可辱：網絡殺手大搜捕》(Don't F**k With Cats: Hunting an Internet Killer) 2019
 |
| 圖片來源：Netflix |
事件嘅起源由一名男子，喺2012年上載咗一條名為「1 boy 2 kittens」虐殺貓仔嘅影片到網絡上，引嚟好多愛貓人士憤怒。好多人喺網絡界利用唔同方法，希望搵出兇手，將佢繩之於法。雖然影片入面嘅男子經過處理，樣貌模糊不清。但係網友利用各種細節，包括背景聲、床單、插頭等等線索，推測男子嘅所在地，可惜搵唔佢嘅真正身份。而最後事件更發覺成一單殺人案，手法極為兇殘。而殺人案嘅兇手，正正同虐殺貓仔嘅兇手係同一個人，而呢個殺人行為，竟然係模仿電影《Basic Instinct》。
5.《恐怖室友全記錄》（Worst Roommate Ever）即將上映：2022年3月1日
 |
| 圖片來源：Netflix |
《恐怖室友全記錄》將於下個月一號上映，講述四位「恐怖室友」K.C Joy、Dorothea Puente、Youssef Khater同Jamison Bachman，外表上睇落待人友善、和藹可親，但其實係充滿謊言、暴力同埋邪惡，令到同居嘅室友十分害怕！
對懸案同犯罪學有興趣嘅你哋，就唔好錯過喇！
請Like我哋個Page：
Leave a Comment