【中環美食推介】蘇豪區巴士小酒館推出超抵食Lunch Set 三款頭盤無限Refill！

 

中環有好多好嘢食大家都知，但如果平日想搵間冇咁貴又可以食到飽，仲可以打埋卡嘅餐廳都真係唔係咁易，而小編就幫大家搵到一間啦！位於中環卑利街嘅Uma Nota 主打巴西日本Fusion菜，門口嘅裝修都比較色彩繽紛同異國風情較重，好有去咗巴西渡假嘅感覺，啱晒打卡！

Uma Nota推出咗Weekday Lunch Set，包三款可以無限Refill嘅頭盤同主菜，頭盤分別有麻醬簥麥麵、香烤椰菜仔同日式炸雞。三款嘅味道都好好，唔會因為可以Refill就求其整。

麻醬簥麥麵每一條麵條都沾滿麻醬，爽脆嘅蔬菜絲增加咗口感。

炸雞炸得香脆，外層有薄薄一層嘅炸粉，加埋佢哋嘅Nanban Sauce同Pickled Vegetables即刻大大降低油膩感。

主菜方面就揀咗香焗雞髀肉配薯仔同汁燒牛柳扒。香焗雞髀肉配薯仔嘅雞肉好嫩滑，配上Chimichurri感覺好清新！薯仔用焗嘅方法烹調，有些少鹽作基本調味，同雞髀肉一齊食好有飽肚感，男仔就咁食呢個主菜都一定夠飽！

汁燒牛柳扒嘅牛柳超級Juicy，肉質好粉嫩，Yakisu Sauce令呢道菜好有日本風情，牛柳下面嘅蔬菜沾上鹹鹹甜甜嘅醬汁好出色，連唔太鍾意食蔬菜嘅小編都忍唔住食多幾啖！

 

Uma Nota

地址︰中環蘇豪卑利街38號地下C號舖

電話︰28897576