【新年打卡之選】佐敦懷舊人氣火鍋店 推午市點心套餐 創意水果及動物造型 超生動可愛！

 

請Like我哋個Page：

生活提案事務所 Lifenews HK

位於佐敦嘅懷舊火鍋店「香江花月」開業以來一直人氣火爆，皆因店內裝飾擺設充滿經典氣息，別具《花樣年華》嘅華人洋行文化格調，令小編好似瞬間穿越時光隧道，重回50年代嘅舊香港，打卡一流！而香江花月嘅「日本牛乳玫瑰鍋」亦非常出名，吸引唔少食客慕名而來品嚐。

除咗火鍋之外，「香江花月」喺農曆新年前隆重推出午市「華洋行點心套餐」，包括4款自選點心、 1或2款自選粉麵、1 款時蔬同埋2客是日燉湯。點心糕點全部都設計成水果同動物造型，非常精緻可愛，仲帶有賀年寓意，絕年係新年必食嘅賀年餐點！

首先介紹兩款鹹點，第一款就係啤梨鹹水角。鹹水角外皮酥脆，包有韮菜豬肉餡，入口有濃濃嘅韮菜味。而小編就私心推薦南瓜金魚餃，蝦餃化身條條金魚喺池塘中暢游，寓意新一年如魚得水。餡料仲加入咗南瓜蓉，比傳統蝦餃更輕盈健康，啱哂怕油膩嘅小編。 

而甜點方面，就有三個選擇。其中最可愛嘅一定係南瓜糕點，煙靭外皮包住用芝麻碎打而成嘅雷沙餡，非常足料，好似一次過食咗兩三粒湯圓落肚。 而另外兩款甜點都係雀鳥造型，分別係黑白天鵝甜沙角同奶皇金絲雞。其中黑天鵝係用杏汁餡製成，白天鵝就係用豆沙餡，金絲雞就包有奶皇餡，各具特色。

如果淨係食點心唔夠飽，仲有幾款精緻飯麵，包括松露三色海鮮炸麵、如意火龍紫米炒飯同埋金玉滿堂（臘味炒飯）。其中最特別嘅一定係如意火龍紫米炒飯，喺炒紫米飯中加入鮮火龍果汁，味道清新微甜，令菜式更加健康之餘，色澤仲配合返賀年大紅大紫，寓意如意吉祥。

「華洋行點心套餐」逢星期一至五，中午12點至下午3 點供應，想食嘅話就要Mark定時間啦。除咗嘢食之外，餐廳入面仲有一個獨立裝置房，放滿夢幻七彩變色波波燈，快啲去打卡影相啦！

Victorian Era 香江花月 

地址：九龍佐敦佐敦道 31-37 號百誠大廈 2 樓 

電話：+852 2736 8368 / +852 6565 7888 

營業時間：星期一至五 12:00-15:00、18:00-00:00 

星期六、日及公眾假期 18:00-00:00 

Facebook: https://www.facebook.com/victorianera.hk 

Instagram: https://www.instagram.com/victorianera_hk/ 

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！