【華燈初上第二季開播】眾多大咖新角色加入兇手仍成疑 吳慷仁演第三性酒店老闆驚艷眾人

 

請Like我哋個Page：

生活提案事務所 Lifenews HK

由林心如擔任總製作人嘅 Netflix影集台劇《華燈初上》第一季播出後反應熱烈，劇中以1980年代台灣日式酒店為背景，喺一眾酒店小姐同埋客人之間嘅情仇愛恨中發生兇殺事件。第一季由林心如、楊謹華領軍，有楊祐寧、鳳小岳、張軒睿、劉品言、謝瓊煖、謝欣穎、郭雪芙等人領銜主演。而第一季結尾林心如老公霍建華驚喜現身，為第二季更緊湊情節同更多大咖演員加入作前奏，令觀眾紛紛期待第二季上架。

第一季完結講述酒店發生兇殺案前嘅故事，而第二季開始探索背後兇手同埋佢嘅犯案動機。霍建華飾演黑道大哥檜木，為咗姊姊蘇慶儀嘅死而尋找兇手。而喺預告中出現近日受王力宏事件所影響嘅女星徐若瑄飾演前「光」媽媽桑瓊芳、近日伙拍柯震東合拍電影《月老》嘅王淨飾演林心如劇中角色年輕時期、9m88飾演「光」酒店小姐，以及金鐘獎男主角得主吳慷仁飾演第三性酒店老闆劉寶龍寶寶一角。而楊謹華飾演嘅蘇慶儀與劇中各酒店小姐都有積怨，兇手仍然成疑，令觀眾更期待睇落去。

當中第二季最驚艷人嘅一定係吳慷仁飾演第三性酒店老闆寶寶。佢日頭以男性打扮生活，但夜晚就化身酒店媽媽桑「寶寶」陪客人狂歡飲酒。吳慷仁喺第二季播出後都喺社交平台曝演出心情，佢話「寶寶」呢個角色似係變裝皇后多於第三性，佢怕如果呢個角色演得唔好會影響外界對變裝皇后同第三性嘅形象。為此佢仲好畀心機向高跟鞋跳舞老師、第三性別人士、變裝皇后做功課。果然，佢嘅努力無白廢到，預告一出就獲得唔少人讚賞，為劇集錦上添花。

請Like我哋個Page：

生活提案事務所 Lifenews HK