【中環美食提案】Acme順滑Hummus配鬆軟熱辣辣Flatbread 中東菜愛好者必試！

 

唔知有冇人同小編一樣，都係中東菜嘅狂熱份子，鍾意周圍搵唔同嘅中東菜試呢？上次就介紹咗Artemis & Apollo，佢哋嘅前菜令人印象深刻，令小編忍唔住再去搵下邊度仲有啲咁出色嘅中東菜！

位於中環伊近利街嘅Acme一直都深受中東菜Fans歡迎，呢度嘅裝修現代得嚟又帶點中東嘅感覺，環境舒服。食物方面，嚟到呢度一定要叫佢哋嘅Hummus，廚師將鷹嘴豆泥打至滑身，調味剛好，配埋熱辣辣、超級鬆軟嘅Flatbread真係一流！

如果有朋友好怕羊嘅臊味，Lamb Shawarma就絕對冇呢個問題，羊肉一啲都唔臊，廚師將羊肉撕開，配上Cream cheese同偏辣、較清新嘅綠色Zhoug醬汁，食落完全冇油膩感，放上Flatbread食都好夾。

Charred Corn on Cob係烤過嘅原條粟米再加上Harissa Aioli、Nabulsi Cheese同Lime Zest。Aioli同芝士令粟米食落唔單調，Lime Zest令整體冇咁漏。

Acme平日晏晝同夜晚都好多人，如果想試下就記得早啲打去訂位啦！

 

Acme

地址︰中環蘇豪伊利近街59號地舖

電話︰28856066