【內有洋蔥！】6歲植物人天瑜聽《蒙著嘴》有反應 姜濤暖心留言拍片鼓勵：快啲好返，咁我就可以親口唱隻歌畀你聽！

一個6歲嘅小妹妹周天瑜，懷疑因為手術期間延遲輸血，慘變植物人，只係得返對眼同頭部可以輕微郁動，連智力都受到嚴重影響。而天瑜爸爸開設咗「天瑜醫療事故關注組」，不時更新天瑜嘅情況同為佢集氣。喺上星期五晚，天瑜爸爸就喺群組上載短片，當天瑜聽到姜濤嘅《蒙著嘴說愛你》，個頭同對眼都有明顯嘅轉動，更加發出哼聲，好似想跟住一齊唱咁！

（圖片來源：天瑜醫療事故關注組 @Facebook）

天瑜爸爸都話：「自從她昏迷以來，這麼明顯的反應是十分罕見的⋯⋯」令佢好感動！而出名善良嘅姜濤，除咗喺影片留言幫天瑜加油，更加親自聯絡天瑜爸爸，仲喺IG Story轉發有關天瑜嘅報道，同拍片為佢集氣，承諾等天瑜好返，會親口唱歌畀佢聽！

（圖片來源：Instagram @keung_show）

姜濤暖心拍片鼓勵全文：

Hello天瑜同埋天瑜嘅爸爸，我睇到你哋嗰段片啦。我都……我唔知道係咪真係因為我嘅歌，有令到天瑜有好到啦；如果係嘅話，我真係會好開心。我唔知可以幫到你哋啲乜嘢，但係我好想錄段片同你哋講，你哋一定要加油，無論係天瑜定係天瑜嘅爸爸。因為我知道，爸爸都好辛苦，照顧天瑜照顧咁耐；所以，天瑜要快啲好返，姜濤哥哥有時間，我一定睇吓可唔可以過嚟探到你。你快啲好返，咁我就可以親口唱隻歌畀你聽，希望你哋加油！