【美容提案】想由內靚到外嘅女生們必須收藏 小編推薦4款1分鐘養生茶

好多女生都有血氣不足嘅問題，每次親戚到嘅時候就更加虛弱，手腳冰冷，到底有咩方法可以改善呢？其實只要每日沖杯養生茶就可以令身體虛弱嘅情況得以改善，而且沖泡方式簡單，材料都好易搵到，冇時間煲老火靚湯補身都唔怕啦！

小編幫大家搜羅咗4款喺1分鐘之內就可以沖好嘅養生茶食譜，除咗有針對改善血氣不足，仲有可以改善痘痘同有修身功效嘅養生茶食譜。

以下食譜都係直接將材料放入熱水再焗10至15分鐘即可飲用。

桂圓紅棗茶

平時手凍腳凍、氣虛、面色較為蒼白嘅女生們就可以選擇沖呢款養生茶，用到嘅材料都係有補中益氣同養血生津嘅功效，特別係冬天呢啲特別需要補氣血嘅季節飲。

材料︰桂圓、紅棗、黃芪、黨蔘

檸檬茉莉茶

貪靚嘅女生們飲呢款就最啱啦，入面嘅玫瑰花因為有較多維他命C仲可以有效預防黑色素沉澱，有助淡斑。而菊花同茉莉花就可以清熱解毒，有祛痘嘅功效。如果想甜啲、易入口啲就可以加入少許嘅蜜糖。

材料︰檸檬、茉莉花、菊花、玫瑰花

山楂荷葉茶

呢款養生茶可以健胃消食，排毒養顏同潤腸通便，有助減脂，想修身嘅女生們就可以選擇呢款。

材料︰山楂、荷葉、枸杞、菊花

枸杞西洋蔘茶

平日成日捱夜嘅你哋就一定要試下呢款養生茶，入面嘅黃芪可以提神補氣同抗疲勞，而焦棗就可以有效地保肝排毒。焦棗就係將紅棗用細火慢慢炒至焦黑色，炒過嘅紅棗會冇咁燥熱同甜，令滋補效果更加顯著，女生們可以炒定一啲放喺度，用嚟沖養生茶同就咁食都好有滋補嘅效果。

材料︰枸杞、西洋蔘、焦棗、黃芪