【鏡聞版】Edan曾經試過自信跌落谷底 最後靠努力發光發熱證明自己價值

 

MIRROR人氣成員Edan呂爵安自細就由父母悉心栽培，比Edan嘗試唔同方面嘅活動，例如彈琴、小提琴同埋演話劇等等，令佢由細細個開始就好鍾意表演，唔怕面對觀眾，同成為眾人眼中嘅「全能王子」，喺讀書時期已經受人注目。但原來，一個咁出色嘅男孩都有自信受到打撃嘅時候。

喺2018年，Edan參加咗《Good Night Show 全民造星》，本來以為憑住自己多才多藝，唱又得跳又得就一定冇問題，但參加咗比賽之後先發現喺香港都有好多好厲害嘅人，令到Edan開始對自己冇信心，甚至覺得自己好快就會出局。

但憑住努力，Edan一路殺入最後十強，佢喺呢個時候終於意識到做呢行就要更加努力去鍛鍊唔同技能同埋提升自己。

雖然花姐都有喺《 調教你MIRROR 》提過一開始邀請Edan入MIRROR嗰陣都有同佢講清楚，Edan喺MIRROR嘅定位只係「陪襯」，但佢都冇放棄，反而係好珍惜呢個機會同努力練習，令自己成為一個更好嘅藝人。

Edan喺MIRROR成團第三年先正式推出自己嘅第一首Solo歌《 E先生連環不幸事件 》，但佢就完全冇妒忌身邊比自己更快出Solo嘅成員，反而係好慶幸自己可以透過《 膠戰 》同《 男排女將 》儲夠人氣先出新歌，令到《E先生》有咁亮眼嘅成績。

Edan樂觀同做任何事都全力以赴、做到最好嘅性格成就咗而家咁令鏡粉驕傲嘅佢，小編身為「爵屎」見到佢有今時今日嘅成就，獲得咁多人喜愛都覺得好開心，希望Edan可以繼續發光發熱，為香港樂壇帶嚟更多好歌！