【滅唔滅到火？】Chanel倒數月曆劣評如潮 被批 $6250「文具套裝」 官方發聲明致歉：收藏品唔可以用貨品價錢衡量

 

請Like我哋個Page：

生活提案事務所 Lifenews HK

早前Chanel首次推出聖誕倒數月曆，紀念品牌成立100週年。不過唔少網民同KOL購入之後，發現裏面大多數都係貼紙、手繩等等文具小物，搞到勁失望！日前人氣KOL雪姨更加直播開箱Chanel倒數月曆，一路拆一路崩潰爆粗，影片短短幾日就破68萬View，除咗令到雪姨一夜爆紅，亦令到Chanel備受批評。

（圖片來源：Instagram @iamsnowwhitewhite）

除咗雪姨之外，美國網紅ELise Harmon都有喺Tiktok拍片開箱Chanel倒數月曆。雖然佢都有稱讚月曆包裝設計滿分，亦都好滿意裏面嘅Handcream，但係當佢開到貼紙嘅時候，就形容成件事係一個笑話（This is a joke）。佢事後喺IG表示，因為呢段開箱片，而被Chanel官方封鎖。

（圖片來源：Instagram @elise__harmon）

近日官方終於回應事件，除咗澄清冇封鎖任何人之外，亦為倒數月曆令大家失望而道歉，承諾以後推出產品會更小心。不過聲明就話月曆嘅設計靈感來自經典No.5香水瓶，強調設計非常獨特同具有原創性，形容係「真正嘅收藏品」，唔可以用裏面貨品嘅價錢，去衡量月曆嘅價值。大家又接唔接受Chanel嘅講法？

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！