【冬至打唔打得成風？】超強颱風「雷伊」逼近！24小時內急升兩級 預料冬至進入香港400公里範圍

12月先嚟打風？颱風「雷伊」喺單日內連升2級成為超強颱風，更加逐漸逼近本港。根據天文台預測，雷伊將會喺下星期一（20日）進入香港800公里範圍內，而喺冬至更加會逼近400公里內。天文台表示，雷伊將會喺今明兩日橫過菲律賓，並會喺週末期間進入南海南部，再轉向偏北移動同逐漸減弱，預料雷伊喺冬至襲港時，風速只有每小時65公里。

（圖片來源：香港天文台官網）

天文台表示，根據現時預測，隨住季候風緩和，本週中期廣東氣溫會稍為回升；但本週後期將受到另一股東北季候風影響，華南天氣會再次轉涼。而對於雷伊喺未來數日移至南海南部後，佢嘅強度同路徑預測仍然存在變數。而同雷伊相關嘅雲帶會影響南海北部，冬至前後該區有機會出現多雲有雨嘅天氣。

（圖片來源：香港天文台 HKO @Facebook）

而天文台亦喺FB以【雷伊會否破紀錄？】發文，指出香港入冬後，一般好少受到熱帶氣旋嘅直接威脅。而自1961年至今，更加只有一次12月「掛波」經驗，就係1974年嘅熱帶氣旋艾瑪。艾瑪當年喺12月1日逐漸靠近本港，天文台先後懸掛一號同埋三號風球，共維持超過27小時。12月2日天文台更錄得177.3毫米雨量，創12月單日最高雨量紀錄，至今仍未被打破。