【2021年度YouTube香港熱門排行榜】Edan《E先生》再下一城 登十大熱門音樂影片榜首 試當真勇奪十大熱門創作者第1位

嚟到年尾，各大媒體網站都紛紛公開全年成績表，而YouTube近日亦都公開咗2021年度香港地區嘅熱門排行榜。而MIRROR成員Edan嘅出道曲《E先生連環不幸事件》，就榮登十大熱門音樂影片榜首。早前《E先生》已經勇奪Spotify「香港最高串流量歌曲」冠軍，今次再下一城，相信喺年尾頒獎禮一定再有斬獲！

（圖片來源：Instagram @edanlui）

另外，人氣YouTube Channel試當真，亦都奪得十大熱門創作者第1位。Channel創立短短一年，就有呢個成績，絕對唔容易。而初創成員游學修亦都喺IG發千字文，講述由2014年創立「學舌鳥」，7年以來嘅辛酸。佢形容自己因為「學舌鳥」得到「一點名氣，同時為我抹殺掉無數機會」，眼看同期出道嘅演員都簽哂電影公司，佢自己「卻從來無人問津」，難得遇到伯樂賞識，又遇上社會事件，令佢星途一直浮浮沈沈。佢直認因為「冇電影拍」先會搞試當真，又話唔知道試當真可以行到幾遠，但「會在世界末日前盡我所能」，真係好熱血！

（圖片來源：Instagram @trialanderror924）

（圖片來源：Instagram @neoyau19）

不過寫完感性千字文之後，游學修都貫徹Channel精神，即刻拍片開箱YouTube寄畀佢哋嘅獎狀同禮物。影片一開頭，游學修就拎出「十大熱門創作者第1位」嘅證書，仲將佢癡喺氣球上面。其他禮物包括有貼紙、簿仔、杯墊，同雪姨開箱Chanel文具套裝，有異曲同工之妙。不過開開下箱，張獎狀竟然跟住氣球飛走咗，搞到游學修崩潰爆粗，真係勁好笑。有粉絲就留言話獎狀飛走，代表「熱門不斷上升」，又問游學修係咪喻意衝出宇宙，小編就好想知道飛走嗰張係道具，定係真嘅獎狀。