【全民造星IV】「女版Ian」 何佩親和力超強《廣告女皇》 阿杰怯場大甩嘴！

《全民造星IV》嚟到第8集，近半參賽者已經登場，當中包括唔少賽前大熱靚女。而喺琴晚播出嗰集，83號何佩都因為外貌受到關注，不過就唔係因為靚，而係因為佢個樣神似MIRROR嘅Ian！而且何佩嘅笑容同Ian一樣咁有親和力，喺面試嗰陣已經令兩位導師梁祖堯同許廷鏗覺得好親切，對佢有好感。

（圖片來源：ViuTV @Youtube）

除咗撞樣Ian，何佩都係人氣Youtube Channel「小薯茄」成員阿冰嘅好朋友，之前都有喺「小薯茄」亮相，難怪咁有觀眾緣。不過唔好睇佢個樣可可愛愛，其實佢參加《全民造星IV》背後有一個好sad嘅故事。

（圖片來源：ViuTV @Youtube）

何佩男友喺上年不幸離世，男友生前好支持佢嘅音樂夢，所以佢今次鼓起勇氣參加《造星IV》，希望自己嘅經歷可以透過音樂，安慰到其他人。而佢喺首輪Battle都揀咗自彈自唱原創曲，獲評判朱康力讚唱得有感情、有經歷，最後憑三盞燈直入60強！

（圖片來源：ViuTV @Youtube）

而另一位受矚目嘅參賽者，就係31號嘅阿杰。皆因佢之前已經參加過 Viu TV 另一個真人騷《廣告女皇》，亦都係樂隊 cooper 嘅主音，有豐富嘅演出經驗。不過佢喺今round就因為緊張怯場而大失準，一入歌就甩哂嘴，但係因為對手嘉嘉嘅表演太詭異、得唔到評判歡心，最終阿杰獲得三盞燈，成功晉級。