【全民造星IV】超人氣選手登場！賽前大熱許軼Day實力超哂班 曾經喺韓國做過半年練習生‼️ 唱將Ika迷倒導師許廷鏗！

上回提到，第三集一班專業Dancers大鬥舞技，雖然精彩，但係評判鄭融都忍唔住問：「點解冇人唱歌嘅？」嚟到第四集，終於多咗參賽者開聲唱歌，唔少仲係跳唱！不過表現就唔係咁理想，有參賽者大破音，聽到導師許廷鏗 「生無可戀」。直到節目尾段，91號嘅Day（許軼）上場表演，即刻拉返高條curve！

（圖片來源：Viu TV 官方網站）

Day擁有甜美外貌加上強大氣場，歌舞發揮都好穩定，其他參賽者都大讚佢「眼神一望上嚟已經贏咗」、「有直接出道嘅架勢」！其實佢早喺節目記者會表演嘅時候，已經企前排C位，獲得唔少傳媒報道，係其中一個大熱選手。原來19歲嘅佢係K-pop舞團「BRIGHTEN Dance HK」嘅成員，曾經遠赴韓國做過半年練習生，接受過專業訓練，難怪可以喺96個女仔入面脫穎而出。

（圖片來源：ViuTV @Youtube）

不過睇返佢嘅面試片段，就意外地蝦碌搞笑。當日佢一開口就介紹自己係港版 Lisa + Jennie，搞到評審們都畀唔到反應；表演跳舞嗰陣仲唔小心仆親跌咪，唱廣東歌又忘詞，好彩最後都入選96強。Day喺IG透露，原來面試嗰日佢仲要拍K-pop Cover，拎住一大袋Costume，由朝早10點等到夜晚9點先有得面試，之後趕去Studio通頂拍Cover，真係Chur到爆！

（圖片來源：Viu TV 官方網站）

另外，今集嘅唱將仲有72號嘅Ika（廖芷嘉）。佢帶嚟原創歌《Feels》，超水準嘅演唱令到許廷鏗都跟住Un，大讚佢唱歌有groove，未唱完就㩒燈揀佢入組！今年25歲嘅Ika係一個唱作歌手，今年先後推出個人單曲《LAVA》同《925》，亦都有自己嘅Youtube Channel，除咗有自創曲，更加有兩段Dance Cover。今次Ika企定定唱歌已經咁壓場，相信加埋跳舞一定會更加精彩！