【全民造星IV】小組對決展開！A3文青清新音樂劇 VS B1神秘火紅熱舞 陳輝陽評B1：好似去咗夜總會！

 

請Like我哋個Page：

生活提案事務所 Lifenews HK

沒有最殘忍，只有更殘忍！《造星IV》60強誕生之後，小組對決隨即展開。比起首輪Battle，今輪嘅賽制更加「地獄」，皆因輸咗嘅隊伍會有一位成員即時被Foul，冇被復活嘅機會。上集首戰，唱將雲集嘅A1就以五盞燈贏咗B5，令到Dru慘被淘汰；其他B5組員都即刻崩潰爆喊，唔捨得Dru離開造星舞台。

（圖片來源：Viu TV 官網）

而今集就由內斂文青系A3對上性感火熱嘅B1。A3為求突破，喺自選項目加入戲劇元素，上演咗一齣感人嘅音樂劇。雖然好多參賽者同導師許廷鏗都畀佢哋嘅真誠打動，一路睇一路喊，但評判就批評佢哋畀情緒影響，發揮唔出水準。

（圖片來源：Viu TV 官網）

而集合Jolin、馬欣同方方三個專業Dancer嘅B1，就使出殺手鐧，火辣跳唱。雖然導師梁祖堯形容佢哋「冇得輸」，但係B1嘅排練過程並唔順利，遲遲都未定到表演方向。好彩最後都成功完成表演，亦都得到評判泳兒嘅讚賞，不過另一位評判陳輝陽就話「好似去咗夜總會」，亦批評佢哋唱歌只係僅僅合格。 

（圖片來源：Viu TV 官網）

最終B1憑住Dance Battle嘅亮眼表現，全取五盞燈勝出。而喺首輪演唱IU嘅《夜信》，畀網民大讚唱功超班嘅Emiko，就因為跳舞生硬而被評判揀中要淘汰，令全場人都跌哂眼鏡，花姐更加嬲到拍枱。又一名實力唱將被Foul，討論區都罵聲處處，怒批評判「亂_咁嚟」。網民由首輪比賽累積嘅怨氣，似乎有排都未平息得到。

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！