【酒鬼們注意】香港本土Gin酒品牌白蘭樹下 與著名香港咖啡師研發全球首支無糖咖啡甜酒

 

相信酒鬼們對香港原創Gin酒品牌白蘭樹下都唔陌生，佢哋將十三種特色草本植物結合埋一齊，釀製出充滿香港特色又帶點藥材香味嘅Gin，令人一試難忘。

鍾意創新嘅佢哋，今次仲同咗本地咖啡品牌《Urban Coffee Roaster》創辦人Gary Au合作，Gary仲係今年Coffee in Good Spirits 比賽嘅香港冠軍！經過足足一年時間，佢哋終於都研發出全球首支無糖咖啡甜酒「淡墨」。

Gary為咗配合返白蘭樹下獨有嘅藥材味，專登挑選咗香港本地烘焙嘅埃塞俄比亞咖啡豆，再交比白蘭樹下專業嘅團隊去以雙重冷萃取方式，盡量保留返咖啡豆自帶嘅花香同果香，而呢種技術都係白蘭樹上自家研發，睇得出佢哋對製作嘅認真。

「淡墨」知道香港人都開始注重健康，所以用咗澳洲牌子Natvia出產嘅0卡路里甜菊糖去取代白砂糖。一般市面上出售嘅咖啡酒其實一枝就等於80粒方糖，雖然佢哋咁甜係為咗拎嚟整Cocktail，但咁大量嘅糖飲咗落肚真係對身體做成好大負擔。而白蘭樹下將「淡墨」嘅甜度降低就係為咗可以比大家就咁飲用都唔會覺得太甜，更加品嘗到當中嘅風味！

小編試過就咁飲「淡墨」同用「淡墨」沖製嘅Cocktail，兩款都飲得出入面嘅花香味同咖啡回甘，仲有 白蘭樹下獨有嘅白蘭花同檀香味，好特別而且好易入口！

 

如果大家有興趣可以去以下網址訂購︰

https://en.pale-ink.com/