【Edan X 鋒澤】合唱歌MV破百萬Views 兩子孖住爆肌答謝爵屎鋒蜜！

早前MIRROR Edan同台灣「狼人殺」男神邱鋒澤合唱，推雙語版失戀情歌《一表人才》同《年青有為》。兩位新生代男神嘅夢幻組合迴響極佳，兩個MV一直雄踞Youtube音樂熱門影片冠亞軍，推出唔夠十日就破百萬Views，成績驕人！

（圖片來源：Instagram @edanlui） 

早前兩人喺IG直播嘅時候，就應承過如果兩個MV破百萬點擊，就會一齊騷肌報答粉絲。一向寵粉嘅佢哋都冇食言，鋒澤就率先公開自己嘅「麒麟臂」，強勁嘅二頭肌完美展現鍛鍊成果。平時行開文青風嘅鋒澤一向密實，今次罕有露肉，鋒蜜們都大感驚喜，就算冇樣睇都流哂口水。

（圖片來源：Instagram @qiufengze） 

（圖片來源：Instagram @edanlui） 

而Edan更加大派福利，除去上衣Show出上身結實肌肉，胸肌腹肌線條超明顯！其實Edan為咗新劇《i.Swim》一直密密操肌，唔怪得騷肌嘅時候咁有自信。Edan都自言而家係24年嚟最fit嘅時候，又自嘲煞科之後應該會「打回原形」。而隊友Stanley同Jeremy都有留言，大表哥就放話挑機，叫佢「試下無個top light」，Jeremy就大讚佢日日食蕃薯係冇白費。