【完美還原！】萬聖節全民Cosplay《魷魚遊戲》 談善言激似脫北女姜曉‼️

琴晚萬聖節，唔知大家玩得盡唔盡興？每年萬聖節都係大家精心打扮，化身唔同人物嘅好機會，而今年最多人扮嘅，一定係大熱 #Netflix 韓劇《魷魚遊戲》入面嘅角色！唔單止喺香港，全球都有唔少人Cosplay《魷魚遊戲》，無論係遊戲參加者、木頭人公仔，定係蒙面管理員，都好多人扮；但係小編覺得扮得最似嘅，一定係本港演員談善言。

（圖片來源：Instagram @tamsyin）

談善言琴晚喺IG連出三個Post，相中嘅佢Cosplay《魷魚遊戲》嘅女主角姜曉。佢著住劇入面嘅綠色運動服，摷亂一頭短髮，加埋雀斑妝同面上嘅傷痕，相似度超過九成！佢仲特意拍咗一條短片，搵人扮埋蒙面管理員，重現大逃殺。片入面佢完全係姜曉上身，就連眼神都入哂戲，殺氣滿滿。

（圖片來源：Instagram @tamsyin）

好多網民都留言大讚佢扮得好似，「以為係同一個人」，仲讚佢靚過原版好多！其實喺《魷魚遊戲》爆紅嗰陣，網民已經有討論過《魷魚遊戲》香港版嘅選角，好多人都覺得談善言最啱做姜曉。如果《魷魚遊戲》真係拍香港版嘅話，有冇可能搵談善言出演呢？