【Channel需要女】試當真公開一週年騷幕後特輯 「四朵真花」落力練舞 阿慈要勁歌熱舞大壓力 Jessica Chur到生濕疹？

 

請Like我哋個Page：

生活提案事務所 Lifenews HK

人氣Youtube Channel試當真上月底喺九展開騷，慶祝頻道創立一週年，各個成員除咗搞笑，仲帶嚟勁歌熱舞，令好多觀眾都覺得好驚喜。其中有一段係由頻道「四朵真花」Jeannie （kayan9896）、Yanny 、Jessica同阿慈跳唱 Super Girls嘅《鎂光燈下》，琴日試當真就公開咗呢段嘅幕後特輯，用紀錄片形式講述四位女生嘅友情同奮鬥史，網民都大讚高質！

（傳送門：https://www.youtube.com/watch?v=xeEWkLUB2J4 ）

（圖片來源：試當真Trial & Error @Youtube）

「台上一分鐘，台下十年功。」雖然只係幾分鐘嘅歌舞表演，但佢哋都落力準備，排練時間表塞到密密麻麻，一啲都唔馬虎。平時行開搞笑路線嘅阿慈，對於要性感熱舞都覺得好大壓力，勤力練舞之餘仲節食減肥，見到燒肉都係聞下就走，超自律！而阿慈嘅減肥伙伴就係Jessica，非常時期飲凍豆漿都要無糖，佢仲自爆忙到兩日加埋瞓四個鐘，更加chur到生濕疹！

（圖片來源：試當真Trial & Error @Youtube）

而Super Girls出身嘅Yanny，跳唱自己組合嘅歌可以話係冇難度，但佢都冇鬆懈，仲會不停為表演細節提建議，其他女仔都讚佢好似大家姐。至於Jeannie就係開心果角色，超級樂觀主義嘅佢就算天冧落嚟都當被冚，令到本身杞人憂天嘅Jesscia，都嘗試學習放鬆啲。

（圖片來源：試當真Trial & Error @Youtube）

雖然今次條片一啲都唔搞笑，似足「星期一檔案」，但好多忠粉都睇到好感動，話覺得好似睇緊女團出道特輯，又大讚「四朵真花」又靚又叻又努力。今次「限定女團」迴響咁好，唔知未來佢哋有冇機會好似豪哥同許賢咁，擁有自己嘅歌、正式出道呢？

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！