【大角咀好去處】休閒風小清新台式Café 主打超足料厚三文治

唔知大家會唔會同小編一樣，去到台灣就一定要去佢哋嘅早餐店，無論幾早起身都無阻小編食碳烤吐司嘅決心！估唔到，喺香港原來都一樣有同台灣早餐店一樣咁出色嘅台式Café！

位於大角咀嘅一浪行休閒同簡約風，木系裝修令人覺得十分舒適，門口位亦係打卡熱點。食物方面，佢哋主打台式吐司，仲有意粉同埋All Day Breakfast揀，有好多選擇。

佢哋嘅「一浪總匯吐司」十分足料，有厚厚嘅蛋、青瓜、蕃茄同雞扒，雞扒嘅調味好足夠。麵包搽上花生醬，加埋一齊真係台灣味十足！小編十分推薦！

另外，小編都叫咗佢哋嘅全日早餐，入面嘅炒滑蛋好令人印象深刻！好滑同充滿住奶香，好啱鍾意濃郁奶香嘅人士。和牛腸油香十足，超級juicy。

芋泥肉鬆吐司亦係必點！芋泥同肉鬆絕對係不敗組合，芋泥唔會過甜，係偏向順滑嘅質地，芋泥控們唔好錯過！而且佢地仲照顧埋素食人士，肉鬆可以轉做素肉鬆，十分貼心。

一浪 Wan Land Cafe

地址：大角咀利得街26號