【人氣打卡好去處】灣仔玩味粉色主調Café 多款特色Fusion菜比你揀

位於灣仔嘅超級人氣咖啡店Trois Café外面用咗粉紅色做主調，仲有個圓形嘅落地玻璃窗，有自然光透入去，無論喺入面定出面影相都好靚！有唔少出名嘅網紅都有特登嚟打卡㗎！

而食物方面，佢哋主打Fusion菜，小編今次就叫咗個Lunch Set，入面有蟹粉小籠包、吞拿魚他他同埋粉蒸肉配炸饅頭。炸饅頭喺中間切開一半，中間夾住豬腩肉同調咗味嘅飯，十分有創意，但偏油膩同味道較為普通，再配上炸過嘅饅頭就令人感覺有點滯。蟹粉小籠包都冇咩大驚喜，味道亦屬中下，完全食唔出有蟹粉嘅味道。

本身小編對鰻魚牛油果Sourdough抱有好大期望，因為鰻魚同牛油果都係小編嘅最愛，但整體都較為令人失望。醬汁較為小，鰻魚偏腥，就算有牛油果都未能為呢個Sourdough加分。

餐廳最出色應該係Cocktail，小編叫咗杯「離地」，用咗茶味Gin做基酒再加上草莓果醬同貴妃烏龍，味道偏向少女風，好易入口。雖然茶味就真係唔太出，但勝在Gin落得夠重手，都飲到Gin獨有嘅風味，為呢杯「離地」加分。

整體嚟講，味道仲有進步空間，但打卡嘅話的確係唔錯！不妨入去叫杯Cocktail打下卡！

美味指數:☑ ☑ ☐ ☐ ☐

打卡指數:☑ ☑ ☑ ☑ ☐

玩味指數:☑ ☑ ☑ ☑ ☑