【抱抱姜B】 姜濤紀錄片《答案》EP1公開！重提IG放負事件 姜濤：突然覺得自己有抑鬱症

 

請Like我哋個Page：

生活提案事務所 Lifenews HK

姜濤上星期預告會提出紀錄片《答案》，帶大家認識真正嘅佢，而《答案》嘅第一集喺琴晚公開。佢喺片中重申，自己拍呢條片唔係為咗令更多人鍾意佢，仲話「可能你睇完呢段片，會唔係好鍾意我。」的確片中嘅佢，褪去偶像光環，同普通人一樣，會發脾氣、會放負、會同朋友鬥嘴、會得戚，小編睇完都覺得佢好貼地。

（圖片來源：MIRROR @Youtube）

一開始姜濤喺鏡房同Dancers練舞，ERROR嘅肥仔作為姜濤嘅跳舞老師，都有出鏡講幾句，兩個人一邊接受訪問一邊鬥嘴，肥仔仲講笑話姜濤真係囂咗，氣氛好輕鬆。之後畫面一轉，播出姜濤喺街場打波嘅片段。片中嘅佢爭波爭到黑哂面，連佢自己都話「真打我就真係好惡㗎啦。」佢亦透露自己打完波「好污糟」，唔想同Fans影相，就會用最原始嘅方法————跑走。睇嚟成名之後，姜濤做好多嘢都唔可以好似以前咁自由自在。

（圖片來源：MIRROR @Youtube）

佢亦都提到早前曾經喺IG放負，大呻「I’m tired of everything」嘅背後故事。佢話當日有廣告拍攝，由朝早化妝到拍嘢之前都好正常，但突然情緒好低落，「好似突然之間唔知自己做緊啲乜」。佢透露過去一年，受家事同好友猝逝影響，一直好抑壓，「好似突然之間覺得自己有抑鬱症，前一秒仲笑，下一秒我就已經黑哂面。」

（圖片來源：MIRROR @Youtube）

MIRROR嘅靈魂人物花姐，亦都有喺片尾現身。佢先向歌曲監製大讚姜濤錄製《Dear My Friend,》唱得好聽，之後揸車接姜濤收工，形容姜濤畀人讚就「囂張」，話佢好似小朋友，讀書拎到一百分之後向同學曬命，兩個人嘅互動真係好似兩母子。姜濤亦承認自己好信任花姐，會同佢講好多私底下嘅嘢，有好多嘢甚至姜濤媽媽都唔知。

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！