【許留山即將結業！】最後一間分店月底結業 60年老字號甜品店將走入歷史 回憶五大必食經典食品！
請Like我哋個Page：
知道大家都會想把握最後時間，去許留山「食回憶」，唔知大家又鍾意食許留山嘅邊款嘢食，又有咩特別回憶呢？小編就特意揀咗五大必食食品同大家重溫，想知嘅話就要睇埋落去啦！
（圖片來源：許留山官方網站）
1. 多芒小丸子
許留山最出名嘅就係芒果系列甜品，其中多芒小丸子絕對係小編嘅最愛！一大杯濃郁嘅芒果汁上面，鋪滿粒粒芒果肉，仲有超煙韌嘅小丸子，加埋清涼嘅芒果雪糕，成個甜品無論口感定係味道都非常豐富，絕對係食極唔厭！
（圖片來源：許留山官方網站）
2. 芒の戀
如果話多芒小丸子係大份夾抵食，咁芒の戀就啱哂花心嘅朋友仔。皆因佢由三個迷你甜品組成，一次過可以試哂多芒小丸子、芒果糯米糍同芒果雪糕撈河粉 三款皇牌甜品，而且份量唔會太多，啱哂食量細嘅女生們！
（圖片來源：許留山官方網站）
3. 芒椰奶西
除咗糖水之外，許留山嘅飲品都非常出色，其中「芒椰奶西」更加係風靡一時，小編身邊嘅朋友都好鍾意飲。「芒椰奶西」顧名思義就係由芒果、椰奶同西米組成，清新嘅芒果中和返椰奶嘅甜，仲有粒粒西米加強口感，三樣嘢夾埋真係Perfect Match，解渴一流！
（圖片來源：許留山官方網站）
4. 咖喱什錦
其實許留山除咗甜品之外，仲有提供多款小食，而咖哩雜錦都係唔少人嘅必食之選。細細碟嘅咖哩雜錦有齊魚蛋、蘿蔔、牛栢葉同魷魚，加埋惹味咖哩汁，啱哂大家過下口癮！
（圖片來源：許留山官方網站）
5. 龜苓膏
唔講唔之，原來龜苓膏都係許留山其中一樣皇牌食品。許留山嘅龜苓膏採用咗矜貴嘅赤靈芝、優質土伏片等超過30種純正中藥煉製，仲要每日喺香港新鮮製造！龜苓膏有助調理身體、固本培元，係唔少老一輩嘅最愛；不過網傳油塘分店已經冇賣龜苓膏，去買之前記住要問清楚啦。
請Like我哋個Page：
你也有精彩的人和事跟我們分享？想查詢廣告合作？請Inbox話我哋知！
Leave a Comment