【金馬獎2021】《濁水漂流》奪最佳改編劇本 導演李駿碩感觸落淚：多謝香港！
請Like我哋個Page：
第58屆金馬獎喺上星期六舉行，今屆有多部港片入圍，其中以露宿者為題嘅《濁水漂流》就憑住12項提名，成為本屆最多提名嘅電影，事前已經被睇高一線。雖然最後《濁水》只係獲得最佳改編劇本一個獎項，但係對首次獲金馬獎嘅導演李駿碩嚟講，意義非常重大。
（圖片來源：Instagram @driftingthemovie）
李駿碩上台發表得獎感言嘅時候，一度感觸落淚。除咗多謝一眾勞苦功高嘅幕後，佢亦有點名多謝男主角吳鎮宇同主演嘅演員，用精湛演技呈現劇本。最後佢亦為電影中講述嘅露宿者打氣，提及佢哋仍然堅持喺法庭捍衛尊嚴，係「善良而正直」，並哽咽講出「多謝香港，香港加油。」
（圖片來源：TGHFF @Youtube）
其實今次已經係李駿碩第二次入圍金馬獎，喺2018年，佢就憑住短片《吊吊揈》獲得第55屆金馬獎嘅最佳劇情短片提名。而佢嘅首部劇情長片《翠絲》同年推出，其中袁富華就憑該片一舉奪得金馬獎最佳男配角。《濁水漂流》係佢繼《翠絲》之後嘅第二部劇情長片，取材自佢喺大學採訪過嘅露宿者被清場事件。
請Like我哋個Page：
你也有精彩的人和事跟我們分享？想查詢廣告合作？請Inbox話我哋知！
Leave a Comment