【揚威海外！】港產片《濁水漂流》入圍《金馬獎》12項提名 本屆入選電影之冠！ 吳鎮宇獲提名最佳男主角
請Like我哋個Page：
每年金馬獎都係電影界不可錯過嘅盛事，而第58屆金馬獎琴日公佈咗入圍名單，其中由李駿碩執導嘅港產片《濁水漂流》獲得12項提名，包括最佳劇情片、最佳導演、最佳男主角、最佳男配角（2名）、最佳女配角、最佳改編劇本、最佳攝影、最佳造型設計、最佳原創電影音樂、最佳原創電影歌曲同最佳剪輯，係本屆得到最多提名嘅一部電影，非常犀利！
該片男主角吳鎮宇早喺2000年，已經憑《鎗火》攞過金馬影帝，今次相隔21年再度有份角逐最佳男主角，鎮宇都話非常開心！鎮宇今次嘅對手係《緝魂》嘅張震、《當男人戀愛時》嘅邱澤、《角頭–浪流連》嘅鄭人碩同埋《金錢男孩》嘅柯震東，競爭相當激烈，未到最後都唔知鹿死誰手！
入圍最佳導演嘅李駿碩就話非常興奮同意外，形容金馬喺佢心目中尤其重要。另外，佢特別高興柯煒林、黃衍仁同梁銘佳都有入圍，因為佢哋同李駿碩一樣比較新入行，能夠入圍金馬獎係一個莫大嘅肯定。入圍最佳男配角嘅柯煒林亦都有喺Instagram出Post多謝大家嘅恭賀，話即刻開咗罐可樂開心下，又強調「香港電影唔差㗎」！
（圖片來源：Instagram @willallwailam）
今年頒獎禮會喺11月27日舉行，雖然受疫情所限，團隊未必可以親身出席，但都可能以影像方式遙距亮相。小編都衷心祝願《濁水》喺今屆金馬獎有好成績！
請Like我哋個Page：
你也有精彩的人和事跟我們分享？想查詢廣告合作？請Inbox話我哋知！
Leave a Comment