【 DEAR JANE 9月演唱會】 6年後紅館再見 四首情歌帶出一個又一個都市愛情故事

 

請Like我哋個Page：

生活提案事務所 Lifenews HK

相隔6年後，Dear Jane終於再喺紅館入面再開演唱會啦，今次演唱會嘅主題係「Dear Jane Pendulum Tour 2021」。由於反應太多熱烈，原本只有9月22至24號三場演唱會，其後再加開咗9月20同9月25號兩場。不過暫時只有9月20號一場門票尚未發售，想把握最後機會去睇演唱會嘅朋友記住9月9號去搶飛啦。

講到Dear Jane，又點可以唔講佢哋精心設計嘅MV同故事，包括製作咗6年嘅愛情三部曲以及得到最多點播率嘅「銀河修理員」。

愛情三部曲主要係由「哪裡只得我共你」、「只知道感覺失了蹤」及「經過一些秋與冬」組成，三首歌都係圍繞住男女主角陳浩然同高小曼之間嘅愛情。

1.哪裡只得我共你

「我要將你拯救，逃離人類荒謬」，相信每個女仔心目中都希望有一個男仔可以做自己專屬啲Hero，將自己從危難入面救出嚟。MV中男主角陳浩然經常去後巷食煙，然後就撞到悶悶不樂嘅女主角高小曼，浩然見到小曼成日都咁唔開心嘅樣，自然就好想帶佢離開現實，重新令佢開心返，慢慢地，兩人就成為情侶…

2.只知道感覺失了蹤

到咗第二部，二人經歷完熱戀期，失去了新鮮感，感情開始出現裂縫。小曼面對浩然嘅不耐煩及冷淡，感到非常不安，雖然佢有努力去維繫呢段關係，不過浩然卻對佢所做所為無動於衷，最後，兩人關係就慢慢踏上盡頭，然後分開。

3.經過一些秋與冬

無意間嘅一個Facebook提示，勾起咗小曼及浩然嘅回憶，五年前結束嘅感情，重新呈現喺二人眼前。浩然非常後悔自己無好好珍惜小曼，對小曼嘅離去，浩然五年嚟都仲未釋懷，但小曼身邊卻已另有他人，雙方都只可以將呢個感情放喺心入面，永遠成為對方嘅回憶，而三部曲都到咗尾聲。

4.銀河修理員

呢首歌以主音Tim同佢老婆楊洛婷嘅愛情故事作參考。男女主角分別為陳樂及程嘉藍。MV入面講述女主角嘉藍嘅媽咪不幸患病離逝，爸爸自此日日借酒消愁，並成日將怒氣發洩喺嘉藍身上。某日嘉藍同爸爸嗌交後，自己去咗屋企附近散步，卻遇上正喺度餵流浪貓嘅陳樂，見到身世悲慘嘅嘉藍後，陳樂決定自此好好守護呢個女仔，並且應承會留喺佢身邊。「狂雨暴雪一起對抗 任歲月再壞 不致心慌」，正正就係男主角對女主角許下嘅承諾。銀河修理員由一推出就廣受歡迎，除咗係三個本地電台音樂排行榜嘅冠軍歌曲，仲成為2020年Spotify及KKBOX串流量最高嘅香港歌曲。

臨去睇演唱會前，記住要聽哂四首歌至去喇，跟住一齊唱先至好feel㗎。

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！