【樂壇最具特色女歌手】 各樣音樂風格都能夠輕鬆Carry！ 細數方皓玟5大值得關注歌曲

 

最近方皓玟終於喺紅館舉行首個演唱會《LOST n FOUND》並於琴日順利完成，有唔少樂迷都有到場支持小明，證明仲有好多人係有留意香港樂壇同埋欣賞香港本地歌手。出道多年嘅小明都有唔少作品，我哋一齊嚟數下有邊5首係特別值得大家關注！

1.       《唵嘛呢叭咪吽》

如果有留意《全民造星III》就一定有聽過參賽者Manson張進翹翻唱，其實原唱就係小明。佛家相信只要念「唵嘛呢叭咪吽」就可以驅除六道本具嘅痛苦，歌詞都係十分正面，例如「惡念冷靜過後美麗背後珍惜所有」，呢首歌絕對可以療癒到被現實傷害嘅心靈。《唵嘛呢叭咪吽》都屬於非主流嘅歌曲，睇得出小明係忠於自己，做自己鍾意嘅音樂，唔會隨波逐流，十分具有個人特色。

 

 

2.       《拖字闕》

呢首歌係同王浩信合唱，由小明親自作詞，因為合唱歌，令到更多人認識小明，當年去唱K呢首歌係必點！同時，呢首歌都係小明少數嘅合唱歌，所以都好值得留意。

 

3.       《如果想我哭》

小明喺2002年嘅時候於台灣正式推出第一隻個人國語大碟《Do You Know》，並留喺台灣發展。直至2006年，轉投東亞唱片，喺同年12月推出第一張粵語大碟，《如果想我哭》就係其中一首被收錄嘅歌曲，喺呢首歌都會見到小明填詞嘅功力。身為小明Fans嘅你哋要識呢首咁經典嘅歌曲！呢首歌都係走當年好興嘅悲傷情歌路線，但旋律十分易記，當年小編仲好細個，但已經對呢首歌好有印象！

 

4.       《你是你本身的傳奇》

相信令到香港人認識小明都係因為呢首歌，出呢首歌嘅時候正正就係處於充斥社會問題嘅時期，而《你是你本身的傳奇》就話比大家知，只要相信同堅持，終有一日都可以搵到屬於自己嘅「生活」，而並非只係「生存」，因為你就係你本身嘅傳奇。呢首歌為香港人打氣，令唔少人都因為呢首歌而再度振奮。

 

5.       《To Haters》

喺2011年嘅時候，小明已經抱住「Haters Gonna Hate」嘅正面心態出咗一首《To Haters》，話比大家知唔好因為別人嘅言論而睇少自己，要堅持自我。小明用慵懶嘅唱法，去唱出自己不願隨波逐流嘅諗法，同埋鼓勵所有被人看輕嘅受害者。