【七師傅愛你】七救星嘉賓大集合 解構每集內容 (持續更新至第八集︰陳婉婷)
請Like我哋個Page：
節目組每集都搵嚟唔同嘅嘉賓，等七師傅可以出手打救佢哋，幫佢地度身設計一系列嘅改運大法，第一集已經搵嚟好難搞嘅林作媽媽同裕美嚟，想幫手解決佢哋之間嘅誤會，令人好期待到底七師傅仲可以點幫每集嘉賓解決疑難。
第一集:林作、林媽媽、裕美
林作而家雖然投身咗保險界，但其實佢曾經係著名大律師清洪嘅徒弟，之後仲做過一排大律師。佢女朋友裕美以前係藝人，港日混血嘅裕美雖然生得靚又識做生意，最近仲做到風生水起，但就因為曾經離過婚同埋有好多唔好嘅緋聞，而令林作媽媽王莉妮極度反對佢同林作拍拖，搞到裕美同林作都好頭痕！
於是七師傅就決定出手幫佢地解決「婆媳糾紛」，點知幫唔到佢地之餘，林媽媽仲想七師傅做佢新抱，取代裕美，喺節目入面林媽媽更送上自己嘅裙畀七師傅，同七師傅上契，做林媽媽嘅契妹。
裕美雖然親手整咗咕嚕肉想同林媽媽和好，但林媽媽表示自己減緊肥，唔會食裕美整嘅嘢，令裕美覺得好委屈所以忍唔住喊。
最後節目組幫佢地整咗張合成嘅三人家庭相，都叫圓咗裕美嘅心願。
第二集:杜如風
出名大洗嘅杜如風畀爸爸杜惠東錫到燶，所以佢要風得風，想買咩都唔洗諗。杜惠東係嘉禾電影公司宣傳部經理，為雜誌做日文翻譯多年，所以杜如風由細細個開始就耳濡目染，精通日文，亦都係因為咁，佢多次被賞識，被邀請主持好多同日本有關嘅節目，當中最為人熟悉就係2007年嘅《流行東京》。
喺節目入面，杜如風想一改大洗嘅壞習慣，所以搵七師傅幫手。七師傅收起杜如風一開始孭住嘅名牌袋後，帶杜如風行紙紮鋪，測試吓杜如風「購物狂」成性到咩地步，點知杜如風連紙紮鋪嘅名牌衫都有興趣，連七師傅都極無奈。於是七師傅帶杜如風嚟到平價衫店，結果七師傅自己都忍唔住，畀杜如風游說到，買咗條連身裙。
七師傅最後決定賣咗杜如風一開始帶嚟嘅名牌袋，自己再另外出一萬，買咗好多物資派畀深水水埗嘅街坊，為杜如風做慈善。
第三集:小肥
「淪為行過寵物 貓狗了解我的悽慘」，大家都知呢首歌係歌手小肥唱，每次講起小肥都會諗起呢首歌，但其實「寵物」同較出名嘅「時光機」已經係14年前嘅歌嚟！數到最近，算為人熟悉小小嘅「負親」都講緊係2013嘅時候推出。歌唱事業一直都冇上升趨勢嘅小肥，決定向七師傅求助。
為咗幫小肥催運，七師傅改咗小肥個名做「五花腩」，更叫小肥增重到222磅，因為七師傅話222呢個數字旺小肥！因為時間關係，節目組安排咗幾件肥仔衫畀佢哋著，齊齊「增重」。之後又帶小肥去海邊大叫同喺滑翔傘唱歌，最後七師傅叫埋小肥好朋友Rubberband嘅主唱6號嚟同小肥開咗個「五花腩音樂會」，想為小肥打打氣，同埋話佢知其實仲有好多人會支持佢。
第四集:郭奕芯
郭奕芯Ashina係一名電影同電視劇演員，13歲參加咗2009年嘅「Yes!!全港校花選舉」，獲得全港甜美校花，14歲就被邀請簽約做Model，2012年被邀請加入北京AG娛樂華人女團Angel Girl，係方文山第一次招收弟子。佢嘅代表作有19歲時參演嘅《同班同學》，呢套戲係由導演彭浩翔監製。生得靚又身材極好嘅郭奕芯自自然然就好多追求者，但佢就表示每次都係爛桃花，男朋友出軌、食軟飯、講大話同有暴力傾向，呢啲郭奕芯全部都經歷過，為咗拆解坎坷情路，郭奕芯終於都要搵七師傅出手。
節目開始，七師傅已經講得出郭奕芯「三大特徵」，其中一個係胸有小紅痣，七師傅話Ashina有呢啲特徵係因為畀「孤狸精」上身，Ashina會遇到咁多衰男人都怪「狐狸精」！
為咗引「狐狸精」出嚟，七師傅搵咗又高大又型嘅謝高晉幫手，然後再出手趕走妖精。七師傅作法做結界去收拾「狐狸精」之後，仲收咗Ashina做徒弟，賜埋佢法號做「八鮮乳」。
第五集:娟姐
練美娟(娟姐)近年十分紅，有份主持ViuTV唔少嘅節目同埋出演唔同嘅電視劇，仲有好多活動都會邀請娟姐出席，喺娛樂圈好活躍。但娟姐一直遇到嘅愛情都係霧水情緣，冇辦法開花結果。七師傅就算到原來娟姐前世係一個男人，曾經同一個女人有段情，個女人想同佢結婚但佢上世又冇同人結到，搞到今世就姻緣運欠佳。為咗轉運，七師傅就為娟姐安排咗個沖喜套餐。
而所謂嘅沖喜套餐就係娟姐要化身娟哥，娶七師傅，去了咗上世嗰個女仔嘅心願。兩個人影結婚相沖喜之餘，仲訂埋酒席，碌晒人情卡，邀請朋友嚟見證佢哋嘅婚禮，喺大家嘅要求之下，娟姐當住大家面錫咗七師傅一啖。
到最後，七師傅居然喺婚禮尾聲宣佈離婚，仲「自肥」，向自己男朋友「阿龍」求婚！原來搞咁多嘢就係想圓自己結婚夢，搞到娟姐被即場「戴綠帽」。但幫到娟姐之餘，七師傅又開心，都叫有個Happy Wedding。
第六集:P1X3L
P1X3L嘅三位成員Phoebus、George同Marco都係由ViuTV嘅《全民造星II》出身，係一隊跳唱組合，成員們都活躍喺ViuTV唔同嘅節目，例如《囝囝女女730》同《嫌疑事件簿》等等。佢哋三個有樣、跳得又唱得，但偏偏星運平平，所以七師傅就幫佢哋搵出問題所在再度身訂造一套改運大法。
七師傅一嚟就話P1X3L個名難記，要幫佢哋改過個名等大家易記啲，師傅話要紅就改個團名做「Oh
My God」。師傅話George思想淫邪，最大問題就係對眼，所以要佢帶上經過特製嘅眼鏡，希望幫到佢嘅心眼功能。經常被網民批評嘅Marco被師傅要求即場讀出負評，要佢學識接受呢啲唔好嘅評語，仲要佢即場唱作，希望佢可以藉此趕走負能量。Phoebus生得靚仔，有偶像包袱都係無可避免，師傅就希望佢放低呢個包袱，所以叫佢換上一套「神級衣服」同派「藕包」畀街坊，做善事嘅同時又幫到Phoebus放低偶包。
師傅話三個都冇「隊長相」，所以決定自己嚟！帶領3位喺有P1X3L塗鴉嘅牆前面跳「Braceless」，最後P1X3L嘅Fans出場，原來啲塗鴉係佢哋親自創造，令P1X3L十分感動。
第七集:黎學勤
「Mr.Trivago」黎學勤Jeffery係一名男Model，拍攝過好多唔同嘅廣告，令佢開始受到人關注嘅就係因為拍咗Trivago廣告，所以先會有「Mr.Trivago」呢個稱號。Jeffery有個煩惱，就係紅廣告唔紅人，想師傅幫佢轉運，令多啲人記得佢。
師傅話Jeffery個名好難記，要幫佢改個好啲嘅名，經過師傅嘅精密計算，決定改佢個名做李嘉誠！七師傅話Jeffery個樣好似李嘉誠，大家都十分愕然，但你哋唔好質疑師傅！師傅話似就似！之後師傅使出第二招幫佢改運，呢招就係喺多根嘅地方貼金箔上面轉運。
師傅叫Jeffery踩架唔係好剎到嘅單車，載埋師傅，師傅喺途中幫佢作法，沿途將象徵財運、愛情、事業同健康嘅顏色紙撒落Jeffery度，希望幫佢增強各方面運勢。
七師傅話Jeffery一定要撞車先擋到災，所以安排咗大家去玩碰碰車，師傅真係為人為到底，玩到嘔都仲要繼續幫Jeffery作法，化解災刧。
去到最尾，師傅話Jeffery唔適合做藝人，叫佢轉行賣菜，因為一定好易受師奶愛戴！
第八集： 陳婉婷
陳婉婷Hebe拍劇拍咗7年有多，拍咗幾十套劇，但係佢嘅角色9成都係做丫鬟或者宮女，妹仔形象深入人心，佢一直想尋求突破做主角，所以就想搵師傅幫佢轉運，等佢可以成功由宮女變成皇后！
師傅話Hebe一直都淨係做妹仔角色有兩個原因，一係因為Hebe演妹仔實在演得太好啦，融入咗丫鬟嘅角色，未能展露皇后嘅氣勢，令到人哋對佢演妹仔嘅印象好深，搵親佢都係俾妹仔角色佢，師傅仲叫佢唔好演得咁神似。二來係因為佢同導演關係一般，所以有重大角色都係俾相熟演員做番。因此，師傅就叫Hebe可能要付出一啲「嘢」啦。
呢樣「嘢」就係霸氣同男子氣概啦！首先，師傅就搵左資深特技人黎教佢打幾招，等Hebe可以搵番啲霸氣嘅感覺出嚟。而師傅就教佢「爆樽」同埋「七連閃電鞭」，Hebe仲吸收得好快，即學即成添。
師傅睇過Hebe嘅命格，算到佢仲要做多20次宮女，所以師傅就要Hebe喊，提前將妹仔嘅委屈喊曬出嚟，咁Hebe之後啲運就會好，點知師傅仲攬住Hebe一齊喊。
而Hebe除咗係一位演員之外，仲係一個直播主同KOL，佢就教師傅開左個Instagram Account，同師傅做咗段Video，教大家化師傅嘅仿妝添！
最後，師傅帶左主持人同Hebe一齊食大排檔，仲搵咗專係飾演江湖人士嘅資深演員李子明嚟教Hebe點先有「霸氣」啲，最後發掘咗Hebe男子氣概同霸氣嘅一面，成功搣甩一向柔弱嘅形象，令佢脫胎換骨。
節目最尾Hebe仲錄咗段Video多謝師傅，仲預告將會同Mirror同Error拍劇添！
(所有圖片來源:ViuTV)
請Like我哋個Page：
你也有精彩的人和事跟我們分享？想查詢廣告合作？請Inbox話我哋知！
Leave a Comment