【難道喜歡處女座】分析林家謙新歌 盤點處女座優點

 

請Like我哋個Page：

生活提案事務所 Lifenews HK

 

喺8月23日凌晨12點，終於都踏入咗處女座嘅週期，林家謙嘅新歌《難道喜歡處女座》都正式公開，新單曲嘅長度係03分09秒，而林家謙嘅生日正正就係9月3日，睇得出處女座嘅林家謙對每個細節嘅執著。處女座一向比人嘅感覺都係追求完美同埋麻煩至極，到底係咪咁樣呢？我哋一齊嚟分析吓《難道喜歡處女座》呢首歌，數吓處女座嘅優點啦！

 

林家謙今次同咗黃偉文合作，作曲同編曲都由林家謙負責，而歌詞就由黃偉文操刀。Wyman之前為Edan@Mirror度身訂造嘅《E先生連環不幸事件》大受歡迎，好多人都覺得歌詞好符合Edan黑仔王嘅特質。今次Wyman就透過《難道喜歡處女座》寫出處女座嘅挑剔同埋追求完美嘅性格，唔知身為處女座嘅大家又有冇共鳴呢？

 

第一句「你的指甲相當潔淨，我很關注瑣碎事情，以X光眼睛 把你靈魂望到 很透明」完全突顯到處女座嘅最大特質，就係好注重整潔，甚至會有潔癖。相信唔會有人覺得鍾意乾淨係缺點嘅，所以呢個都係處女座嘅一個優點。

 

其中一句歌詞係「敏感的我假裝冷靜，内心充滿對未來不確定，是否揀你，三千晚循環驗証仍然未決定」。處女座神經敏感，就算係啲好細微嘅事都要考慮得好清楚，有人會覺得呢種性格係「婆媽」。

 

「情願似白羊、似摩羯座，無謂纖細又糾結像我，想找人呵呵，大眾偏說尋求情人别揀我」，白羊座最大嘅特質就係衝動同大膽，摩羯座就意志力強，唔容易受到影響，有主見，同處女座有個鮮明對比。歌詞提到大家都叫人唔好搵個處女座嘅另一半，因為好麻煩、成日都猶豫不決。但小編就認為呢啲係心思細密，可以避免到好多錯誤同麻煩，闖少好多禍㗎！粗心大意嘅小編就好羨慕處女座呢個優點啦。

 

從「污點怎漂白，如果太煩誰稀罕愛我」同「單身一世吧，除非有人煩都不怕我」就知道，其實處女座都好渴望被愛，佢哋唔表現出嚟只係因為未搵到一個可以承受佢哋嘅過度細心同追求完美嘅執著，相信處女座嘅林家謙都等待緊呢個「容忍」到佢嘅女仔出現。

 

其實換個角度睇處女座嘅缺點，嗰啲都係好值得學習同欣賞嘅優點，希望所有處女座嘅人都可以搵到懂得欣賞自己優點嘅人。

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！