【陳嘉倩形象大不如前？】探討陳嘉倩遭受負評4大原因！駕駛技術被稱「公路炸彈」？主持奧運零作用？鏡頭前後係兩個人？

 

請Like我哋個Page：

生活提案事務所 Lifenews HK

前新聞女主播陳嘉倩轉行做藝人後不斷遭受負評，由一開始扮演《FINAL FANTASY VII》嘅Tifa遊戲角色叫人登記做選民，被一班網民封為女神，變成走上KOL/藝人之路，負評有多冇少。近日網絡紅人司徒夾帶喺Facebook 分享咗一張Error成員保錡喺奧運節目攝陳嘉倩鏡頭嘅畫面截圖，對保錡攝鏡表示不滿。隨即吸引杜汶澤嚟留言，將畫面截圖剪走陳嘉倩得返保錡，並且分享到留言區話咁順眼好多，仲加咗句話陳嘉倩係電視界史上最作狀嘅女人，呢個舉動得到好多網民附和讚同。陳嘉倩就網民對佢本人主持奧運節目畀負評喺IG作出千字文回應，到底呢位「嘉倩BB」做咗咩搞到負評多多，一齊嚟探討下陳嘉倩形象插水嘅原因啦！

1. 駕駛態度惡劣，人稱「公路炸彈」

早幾個月前播出嘅ViuTV節目《學神出沒注意》，考到車牌嘅陳嘉倩有份做嘉賓，喺路面接受揸車考驗。節目有一集陳嘉倩要喺合和中心停車場泊車，但開車過程中分心搞到撞上欄杆，事情發生後未有即時落車了解。節目播出後遭受網民抨擊，質疑佢嘅車牌點考返嚟，被封為「公路炸彈」。事件發生後，陳嘉倩有為佢失態喺IG道歉。

2. 拍攝廣告疑黑臉擺款，臨場拒拍要求準時收工

上年陳嘉倩同新人黃以諾合作拍廣告，在場有位自稱係粉絲嘅工作人員向傳媒爆料，指陳嘉倩喺等埋位拍攝時候黑臉擺款，表現唔耐煩，全程企喺行人通道中間補妝。到正式埋位拍攝時，毫無回避當眾雙手扯Bra 整理上身衫。工作人員又爆料指，當時拍攝廣告有一幕係關於鼻鼾困擾嘅戲份，陳嘉倩為咗保持女神形象，臨時拒絕拍攝搞到工作人員要臨時重新改劇本，令拍攝進度推遲。 而害到拍攝團隊大失預算嘅陳嘉倩，仲透過經理人講要準時收工，令到幕後工作人員OT補鑊 。

3. 主持奧運節目做花瓶零作用

陳嘉倩喺主持東京奧運節目期間，唔少網民批評佢喺咁多日賽事冇做足資料蒐集，只係識得坐喺旁邊賣笑做花瓶，質疑佢冇做主持應有嘅本分。有網民話佢全程17日主持嘅作用係零，更有人指見到佢即刻想轉台。就杜汶澤同網民喺司徒夾帶Facebook 留言對佢主持態度有質疑，陳嘉倩發表千字文回應，有講到佢係一個怕是非怕煩嘅人，承認自己喺主持嘅功力仍然有改善空間，表示日後仍會努力學習。

4. 上綜藝節目玩遊戲行為低俗

再早前陳嘉倩有上Mirror 聯同Error 嘅綜藝節目《考有Feel》玩遊戲，其中一個遊戲環節係「風狂大決鬥」，參賽者需要限時內喺強風下整理好床褥同埋著上完整睡衣先叫完成任務。到Mirror 玩呢個遊戲時候陳嘉倩出術，偷走佢哋嘅睡褲並且著上身，搞到當時Tiger 同Alton 好尷尬唔敢掂到陳嘉倩，喺要完成任務之下，最後由Alton 斯文慢慢搶返條睡褲完成任務。節目播出後又引起一眾網民批評，對佢喺節目嘅言行舉止表示不滿。

由一個新聞主播轉行做藝人，好多時候自己嘅一舉一動備受關注，外界批評係每一個藝人必經嘅階段，陳嘉倩喺千字文當中有講過：「正面嘅留言我當然歡迎，但批評嘅留言我更珍惜。」佢表引用李慧詩嘅說話，結果未如理想，但起碼博盡無悔。各位網民，對於陳嘉倩嘅回應收唔收貨？

圖片來源：@ViuTV 考有Feel 截圖、IG@kasin520 

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！