【萬里大長征】PS5賣家呃網民去坪洲交收 被放飛機嬲到震：你做人都冇誠信！

為咗心愛嘅PS5，就算萬里大長征都冇難度？有網民近日喺facebook分享一個冇良心嘅賣家為咗呃錢，竟然叫買家山長水遠入去坪洲交收，最後個賣家緊係no show啦，結果對方一朝早去到得個桔，唔少網民笑佢太蠢，亦有網民讚佢夠堅持又有恆心，「車錢都蝕埋，真水魚喎」、「世間難求嘅好男人」。

被呃嘅網民最近見到有人網上放售幾乎全新嘅PS5，於是嗱嗱聲WhatsApp賣家傾交收詳情，不過原來對方有心呃錢，仲要求喺坪洲交收，為咗呃人呃到底，就扮好心提出可以先入數後郵寄，唔使對方長途跋涉走入坪洲。

                                                                圖片來源： fb@on9仔女同盟會 (on9限定) 官方後備群

不過嗰位網民又蠢唔晒，堅決要一手交錢一手交貨，最後雙方達成共識，約喺第日朝早7:30喺坪洲碼頭交收。網民第朝即刻由黃大仙出發去中環，再搭7:00頭班船入坪洲，諗住「實食無痴牙」。

點知蠱惑嘅賣家開始玩嘢，話自己做魚排約咗個客7:30交收，叫嗰位網民喺碼頭附近等，結果準時到埗之後，賣家聲稱趕唔切過嚟，完全no show，仲要說服網民入數，遲啲再寄貨，對方被放飛機當然嬲到震，係咁鬧賣家出爾反爾：「你做人都冇誠信，我仲點信你？」

事件喺網上瘋傳引起大批網民討論，唔少人表示好慘，「其實佢專登六點幾起身出去，老實講，都好佩服佢，雖然係中咗招」、「下次約去非洲」、「一睇就知呃人，咁都信」。但亦都有網民讚佢醒目，「無畀人呃錢都算係咁」、「淨係蝕咗船錢都算係咁啦」。

其實山長水遠入到嚟啦，坪洲都有唔少景點，嚟返個半日遊都唔錯喎！

                                                                                圖片來源： ig@littletravelgirl

1.東灣沙灘

島入面其實有個沙灘，平時冇咩人可以任意打卡，隨便加一個filter都會影得好有feel。

                                                                         圖片來源： ig@kurt_tk_

2. 牛皮廠秘密花園

坪洲以前係個工業鎮，依家剩底一個廢棄嘅牛皮紙廠，早前被當地人用藝術裝飾，變身為富藝術感嘅秘密花園，每個月都有各種雕塑同藝術品，好適合文青打卡影相！

                                                                        圖片來源： ig@hkbanker.foodie.oldsion

3. 祺森冰室

行到餓餓哋，緊係要試吓當地名物 - 蝦多士，呢間餐廳嘅招牌小食一定要數到蝦多士，即叫即炸，每件一開四，外皮用上麵包糠炸過，脆卜卜超好食，另外仲有唔少美食選擇，熱辣辣天氣再飲返杯「凍鏈茶」，爽晒！