【本地攝影師推介】Edas Wong最叻做錯「視」 超現實鬼馬街拍

今日同大家介紹本地攝影師Edas Wong，作品多數係利用錯覺而拍成嘅超現實街拍照。靈感來自放空自己，專注平日唔會注意嘅事物，在物件與物件的時空交錯下，一剎那嘅觸動，「咔嚓」一聲，就影成一張照片。

 

Edas形容部份作品有啲「無厘頭」，創意嘅背後，佢嘅職業竟然係解決方案經理。返工時負責設計同開發網絡，Edas形容自己工作比較系統化、講求邏輯，而攝影可令自己工餘時放鬆。

 

Edas嘅第一張街拍照，奠定咗佢之後嘅攝影風格。

 

Edas本身影開旅行風景照，嗰時啲相已畀老婆話好古靈精怪。除咗鬼馬嘅街拍照之外，Edas最鍾意嘅相反而係呢張充滿美感嘅相片，最特別之處係令人有種莫名嘅感動。

Edas最鍾意嘅一張相--光與光嘅交錯

Edas眼中嘅攝影係一種語言，屬於創作同藝術。雖然攝影並非文字，但可表達自己當下心情及對世界嘅認知。Edas話創作時唔好偏執既有框架，回歸到最簡單、最空白嘅認知，就可以另一角度解釋呢個世界。

 

對於Edas嚟講，攝影有兩種層次：1. 自己放鬆嘅方法2. 其他人因為佢嘅照片而放鬆。Edas話呢嗰時代因為經濟、疫情、社會而十分壓抑，希望觀眾喺碌緊IG睇到佢啲作品後，可以會心一笑。

Edas近期幾鍾意嘅一張相

快啲㩒入Edas嘅IG@edaswong睇佢更多作品！