【蛻變提案】【每一次見工 都察覺到一次蛻變】

我叫呀Ming，畢咗業出嚟嘢都6、7年。呢幾年Through JobsDB都見過唔少嘅工，加加埋埋都有10幾份。見咗咁多份工，發覺對面都好鍾意問一條問題：「你期望可以喺度做到啲咩？」而隨住時間嘅推移，我都會有唔同嘅答案，所以每一次見工，我都察覺到自己成長咗，蛻變咗。

第一份工，係喺新蒲崗都返工，對於住屯門嘅我嚟講非常唔方便，但因為我係Fresh Grad，所以對個Interview都係非常重視。當對方問我，我期望可以做到啲咩嘅時候，我都係非常用心答。我話：「我期望可以喺度學到好多唔同嘅相關知識。因為我知道貴公司喺行內都係算有名氣，我覺得自己可以喺度學到好多唔同嘢，學完之後我就可以將自己嘅能力貢獻返畀公司，令到公司同自己都一齊進步。」

諗返起自己呢個答案，都覺得自己當時天真得濟。學嘢？老老實實，冇一個老闆、冇一間公司係想請一個人返嚟學嘢。呢度係辦公室唔係學校，所以咁答真係好天真。冇辦法，當初係Fresh Grad冇乜工作經驗，所以答得都會有啲差。

第二份工，係喺一間新型嘅廣告公司到做。今次呢間公司好少少，喺荃灣，至且人工都唔錯，所以我又係非常期待今次嘅Interview。而佢問我期待啲咩嘅時候，我答：「我希望可以用自己嘅能力幫到公司，令公司唔單止更加多Job，而要令本身都Run緊嘅Job嘅質素都更加好。換句話講，我期望自己可以做到令公司嘅Job無論係質定係量都有明顯嘅上升。」

經過咗一兩年嘅工作，我覺得自己呢個答案比起上一次成熟咗。起碼，我識得企喺對面嘅角度出發，識得幫公司諗。不過，我自己對自己呢個答案唔係太滿意，因為我覺得自己太喺公司Angle出發，而忽略咗自己個人感受，而講出口畀人聽，個答案都有啲假同造作唔夠真誠，所以我都係唔太滿意呢個答案。

第三份工，又係好遠，不過今次係去一間出晒名嘅傳統大公司到做，所以我都準備好晒應該講啲咩。我話：「我期望自己做出嚟嘅Job質素要夠高，高到有一日行內每一個人都有睇過呢個Job，仲會覺得呢個Job做得好好，成為咗其他人嘅Reference。」

而呢個係我暫時覺得最好，亦都係我成長之後得出嚟嘅答案，呢個答案唔單止滿足到公司，仲滿足到自己。因為我可以話畀公司聽，我做到嘅嘢質素好高幫到公司，同時都令自己可以獲得成功感，入面有真誠、有期盼、有目標，呢個係我覺得最滿意嘅答案。

而近期我又開始喺JobsDB搵工，佢入面有好多工作選擇，見到唔同工嘅時候，我自己心入面都會諗如果要Interview要點樣答問題。Click完唔同嘅Apply掣，交完唔同CV，我終於諗到嚟緊我會點答「你期望可以喺度做到啲咩？」呢條問題。開始追求穩定嘅我或者會答：「我期望今次會係我最後一次用呢個App，因為我喺一個地方長遠咁發展我事業。」