【球壇的愛】 印證「世界再壞仍舊不怕」

歐國盃已經開始咗一段時間，除咗每日嘅比數之外，相信最令大家關注就係丹麥嘅球員艾歷臣。點解咁關注佢？唔係因為佢係一個入球機器，都唔係因為佢入咗球世紀金球，而係因為佢喺比賽途中突然失去知覺。

而呢件事件，正正可以睇得出真正嘅體育精神，同埋人嘅崇高品德。喺艾歷臣昏迷之後，大家馬上停止同忘記所有比賽嘅事，一齊去為艾歷臣救急同祈禱，而對手芬蘭嘅球迷都獻上國旗畀醫療團隊保護艾歷臣嘅私隱！以為淨係得咁少事？錯喇，過咗呢件事差唔多一星期，不同國家嘅球員依舊為艾歷臣送上祝福同致敬。

例子就多喇，例如芬蘭贏咗丹麥，取得歐國盃史上第一勝，但都拒絕慶祝。例如比利時嘅盧卡古喺入波之後第一時間衝去鏡頭，同艾歷臣講咗聲我愛你。例如迪布尼對丹麥入咗波，都冇大肆慶祝入球，賽後比利時贏咗仲同丹麥球員互擁。

呢件事就證明咗，世界再壞都仲有好多好好嘅人同大家一齊渡過。想講嘅係，其實呢一兩年嘅疫情肆虐，相信大家都未必過得最好。不過，就算呢個世界幾難捱都好，都有好多人同你一齊渡過！世界再壞仍舊不怕，大家以後都要互相支持，難關一定會過㗎！