【集體回憶】5個8、90 後童年必玩電腦遊戲

 

童年玩過嘅遊戲都係每一個8、90後香港人嘅集體回憶，有時望住童年嘅小遊戲已成為歷史、甚至冇再營運，真係唔認老都唔得！依家就等小編同大家回憶番5個童年經典電腦遊戲啦！睇下你哋又有冇玩過？

跑Online：

圖片來源：《跑online》官網

「留在彼此的身邊，牽著手再繼續飛」，呢句歌詞簡直有聲！跑Online真係經典中嘅經典，亦都係唔少人第一次課金嘅線上遊戲。玩家操控遊戲角色進行賽跑比賽，仲可以加入公會、結婚、養寵物、買裝⋯⋯小編仲記得細細個一放學就即刻開電腦玩跑online，仲記得納魯西施一跌親嘅絕望感。依家小編仲會周不時同啲朋友一齊玩番跑online㗎！

電眼少女：

圖片來源：《電眼少女》遊戲截圖

玩家扮演一個美少女，用電眼「電暈」啲少男，當中會遇到唔同對手，需要battle爭啲仔仔。但憑住驕人嘅美色（其實係瘋狂㩒滑鼠左鍵），「我」仲可以「電暈」王子同男鬼𠻹！遊戲仲有唔同版本：學園篇、沙灘篇、祭典篇，你又玩過哂未呢？

辦公室偷情：

圖片來源：《辦公室偷情》遊戲截圖

玩家需要喺老細聽電話時，同隔離嘅靚女同事接吻！但原來老細都鍾意靚女同事，所以千祈唔可以畀老細知道，要喺老細收線之前就收手啦！

小朋友齊打交2（LF2）：

圖片來源：《LF2》官網

玩家可以用不同嘅招式、攻擊同道具，控制遊戲角色打低對手。每個角色仲有唔同嘅招式、攻擊力同防禦力，而且玩家喺輸入密碼之後，仲可以使用到隱藏角色，真係好有趣，玩極都玩唔厭。呢個遊戲仲要係香港人整出嚟，真係好自豪！

星願小王子：

圖片來源：《星願小王子》官網

裡面有各種嘅益智小遊戲，例如造句、配對英文單詞⋯⋯透過通關唔同小遊戲，獲得打造武器嘅材料，最後用最強大嘅武器打敗Boss。小編估計大多數人都係透過學習平台「小校園」先會玩星願小王子㗎。

其實仲有好多經典童年遊戲無提到，例如：賽爾號、摩爾莊園同尼奧寵物，仲有一系列Asiadog.com、4399、Facebook裡面嘅遊戲⋯⋯最侯生嘅99年都已經22歲，唔少已經踏入社會工作，小編真係好掛住細細個無憂無慮嘅日子呀！以上講嘅遊戲，你哋又有冇玩過？快啲留言同小編講仲有啲咩經典遊戲啦！