【品味生活】週末小清新 小編精心挑選3款價錢親民抵飲白酒

 

請Like我哋個Page：

生活提案事務所 Lifenews HK

 

唔少女士都覺得紅酒好難入口，因為佢比較澀同厚身濃郁，的確唔係每個人一嚟就接受到呢種較「重口味」嘅酒。而白酒呢種易入口、較易接受嘅酒就啱晒啲鐘意清新同果味嘅女士，咁到底有咩白酒係較適合新手去飲，同埋價錢又親民小小，可以買枝嚟嘆住過今個假期？小編揀咗3款唔錯嘅白酒介紹比大家，等大家可以參考一吓！

 

Cloudy Bay, Sauvignon Blanc

喺紐西蘭嘅Cloudy Bay喺1985年創立，創立酒莊嘅就正正係Cape Mentelle酒莊嘅創辦人David Hohnen。喺2004年嘅時候成為咗著名集團Moet Hennessy Wine Estate嘅其中一位成員。而呢個酒莊之所以出名就係靠Sauvignon Blanc，Cloudy Bay身處嘅Marlborough產區更加係集中咗好多釀製出色Sauvignon Blanc白酒嘅酒莊。

呢枝酒帶有熱情果、青檸同埋番石榴嘅味道，無論係聞起上嚟定飲落都感受到佢果香極重，好啱餐前配啲比較清爽嘅食物，例如沙律同埋味道較輕嘅山羊奶芝士。

 

Leeuwin Estate, Art Series Riesling

酒莊位於西澳嘅Margaret River，喺1979年就生產咗第一批酒，由於地理環境十分適合種植葡萄，再加上佢哋出眾嘅釀酒技術，Leeuwin Estate嘅出品好快就受到矚目，因為佢咃釀出嚟嘅酒都十分優秀，品質有絕對嘅保證。Leeuwin Estate仲曾經被著名嘅酒評家James Halliday大讚係連續15年嚟見過最代表到頂級澳洲酒嘅酒莊。

而今次要介紹嘅Art Series係每年都會搵當代著名嘅藝術家，為每款唔同嘅酒畫一幅圖，然後成為嗰個年度嘅酒標設計，令Leeuwin Estate嘅酒更顯高貴。呢個系列特別嘅地方就係會揀最靚嘅葡萄去釀出最好品質嘅酒。呢個系列嘅酒唔單止好飲，仲要好有收藏價值㖭！

佢聞起上嚟好清新，有青檸同檸檬嘅香氣。呢枝酒比較Dry同酸，飲落帶啲青蘋果、青檸同香橙味，好醒胃，個人覺得好啱喺呢啲咁熱嘅天氣飲！

 

Giant Steps Sexton Vineyard Chardonnay

Giant Steps位於澳洲嘅Yarra Valley，佢地淨係會人工採摘葡萄，並唔會用機械採摘，因為佢地尊重葡萄嘅自然生長，唔想比機器破壞到葡萄嘅品質。酒莊對釀酒嘅每一個細節都好注重，發酵都係用天然野生酵母，而釀酒就用咗重力引流，盡力還原葡萄嘅個性。酒莊一絲不苟嘅態度，釀造咗唔少獲獎嘅酒，喺唔同嘅展會上贏得50幾個金牌，仲被Wine & Spirit Magazine評為全球百家酒莊，同時，佢地都係JH紅五星酒莊，可見Giant Steps嘅釀酒技術同實力不容忽視。

雖然呢枝酒嘅價錢好平，大概係港幣300蚊樓下，但絕對係物超所值，用平民價錢得到不一樣嘅享受。佢係屬於Dry嘅白酒，有啲青蘋果同埋輕微煙燻嘅味，各樣都Balance得好好，好值得一試！

 

 

請Like我哋個Page：

生活提案事務所 Lifenews HK

 

你也有精彩的人和事跟我們分享？想查詢廣告合作？請Inbox話我哋知！