【蘋果日報】記錄26年歷史任務正式結束 市民無懼落雨排隊買最後報紙

《蘋果日報》最後一份實體報於今日（24日）喺全港發售，動新聞網站亦於午夜停止更新，記錄26年香港歷史嘅任務，正式完滿結束。

《蘋果日報》由黎智英創立，於1995年6月20日於香港出版第一份報紙，當時採用減價促銷策略，每人買報紙仲送一個蘋果，曾引起同各大報刊嘅搶客戰。而《蘋果日報》無論喺報道風格、排版等都開創咗香港報業嘅先河，例如頭版加入圖片、大型化標語，加上用色鮮豔搶眼，成為大家口中嘅「蘋果化」。

要令報道更「juicy」，蘋果引入狗仔隊文化，甚至出現「蘋果照妖鏡」欄目，成為大家每日茶餘飯後必傾嘅娛樂新聞，同時對整個娛樂圈生態作出好大改變。要成為報業界嘅尖端，一定要快人一步，《蘋果日報》1998年已經出現網上新聞，隨住人人都用手機上網嘅潮流趨勢，2006年終於出現「news@pple網聞」，即係無人不曉嘅「動新聞」前身，由文字新聞化成動畫短片吸引大批觀眾，後來同界有唔少報刊跟隨做法。

得知蘋果日報停刊，大批支持市民尋晚親身到蘋果日報公司門口向一眾員工致謝，而今早大量報攤、便利店今早瞬間售罄最後的實體報紙，但大批市民無懼落雨照排隊等待返貨，希望作最後見證。