【日常生活】 《那些年，我們在Neway發過的癲》

 

有冇人覺得，Neway清盤對於你嚟講係一個大震撼？

當年第一次唱K嘅感覺，到十幾年後嘅今日都仲記得。

嗰陣對於我嚟講，唱K係大人嘅事嚟，

有得同朋友去唱K係成長嘅表現，話畀人聽我大個仔喇！

最記得嘅係入到去明明好想唱卡通片嘅主題曲，

但怕畀啲朋友仔笑我幼稚，就特登揀咗Twins嘅情歌嚟唱。

唱唱下有人送嘢飲入嚟，即刻怕醜放低支咪唔唱，

諗返起嗰種青澀，真係忍唔住打咗個冷震。

之後就開始去慣去熟，唔再係唱K新手，

唱嘅歌都愈嚟愈奇怪，

尹光嘅《少理阿爸》、天堂鳥嘅《登錄太陽》都係必點歌，

仲要一路唱一路跳，自己將啲燈又開又熄當係演唱會。

呢種極無厘頭嘅唱K模式，睇怕都會成為歷史。

而除咗唱K之外，去Neway有另一個目的，就係叫春。

喂，有邊個未試過失戀唱K先？

就係第一次失戀，我去咗Neway唱K飲酒，

亦都嘗試咗人生嘅第一次飲醉酒。

而都係因為Neway，令到我開始鍾意咗飲酒。

朋友失戀？去Neway飲酒！

生日？去Neway飲酒！

聖誕？去Neway飲酒！

真係遲早連清明重陽都要去一轉Neway！

而近呢一年，冇細個嘅時候咁鍾意玩，

Neway就變咗一個聚舊嘅場合。

傾下返工有幾辛苦，

傾下自己買唔起樓，

傾下自己同另一半生活點樣。

所以一句到尾，

Neway一早已經唔止係一個唱歌嘅地方。

其實我明，我一早明再美好嘅事都有完結嘅一日。

琴日係UA，今日係Neway，聽日可能係海洋公園。

我哋能力好有限，做唔到啲咩救佢哋，

就唯有趁佢仲喺度嘅時候望多佢一眼。

而家，我最希望就係可以臨走前唱多一次古巨基嘅《勁歌金曲》，

延續最後嘅Neway唱K時光。