【一生人，都係想識個會幫你買M巾嘅男仔】提案小品 by 陸敏而

 

Katie在個人護理用品店內，手握着一包軟棉棉的 「安睡褲」衞生巾，她看着包裝上身型略胖的冇尾熊，覺得可愛，想起往事，她更發出了一個會心微笑。 

「安睡褲」，這種似BB尿片又似成人尿褲的產品，在女生之間是一件幾好笑的驚世發明。對於Katie來說，它是一件不可或缺的生活必須品，當中沒有之一。 

25歲的Katie體格正常、智力正常，但她身上經常出現女生尷尬事：自她第一次M come開始，一年總有一兩次，可能是不知自己嚟M，又可能是流量大，令她的裙或褲出現令人尷尬的痕跡。 

直至這款安睡衞生巾出現，Katie才結束她漏M的歲月。 

回想幾年前，Katie還是大學生，有一日，她在學校canteen準備點餐時，忽然有人拍她膊頭。那個男子看上去也是學生，秀氣的、架着黑眼鏡，乍看還有點吸引人的書卷味。

 

他忽然湊近Katie，在她耳邊輕聲說：

 

「喂，妳係咪漏M？條裙污糟咗，好覺眼下喎。」

 

當時未拍過拖的Katie，先因為有男子忽然挨近她而嚇了一跳；再思考一下他所說的話，更令到Katie兩頰發熱滿面通紅。

 

她張開嘴，嚇得說不出話，倒是這位男生相當冷靜：

 

「如果妳唔介意，不如搵個位坐低，畀$200我，幫妳去學校隔離商場買條褲啦！」

「吓？二百蚊？」

「唔係呃妳，唔信你睇我銀包，真係冇錢。」

見Katie毫無反應，他反而更心急：「我真係想幫妳㗎！妳嗰邊坐低我好快返嚟！」

 

 於是，Katie像着了魔一樣把$200雙手奉上。

 

坐在canteen，想着自己正坐在那條已沾了血的裙上，Katie覺得時間過得特別慢。

 

「我今日點解着淺黃色裙？點解唔揀條黑色？」

「點解會有人走埋嚟搭訕？」

「佢係咪另有所圖？」

「買過條褲？佢又知我size?」

「頂！買過條褲，冇M巾，咪一樣咁大鑊？」

 

平時乖乖聽話的她，繼續聽那男生的說話，坐着等着。

 

好不容易，30分鐘過去，Katie開始覺得不對勁。她開始想，那個男仔搞乜？要不要打給同班女同學求救？然後，她回帶那男生那句「你睇我銀包真係冇錢」、「畀二百蚊我一定搞掂」……

 

Katie心想：「唔通佢睇準我咁無助，落晒嘴頭，就係想呃錢？」

 

「呃$200，算唔算睇得起我？」

 

Katie愈想愈覺得自己被騙，加上差不多兩點半仍未食飯，此刻她既無助又難堪又生自己氣。望着cateen檯面一粒未清理好的麵包碎屑，她終於忍不住哭了。

 

她不單止哭，還哭出聲，令周圍的人本來想裝作見不到她，漸漸也裝不下去。

 

「妳，冇咩事吖嘛。」一位女孩遞上紙巾。

 

正當Katie接過紙巾，那男生終於氣沖沖拿着一個購物袋回來。還未止住眼睙的Katie搶過購物袋，頭也不回直奔洗手間，連那男生一臉愕然她也顧不得了。

 

Katie在廁格打開購物袋，裏面有一條淺藍色牛仔短褲，還有一包內褲、一包衞生巾。

 

他這麼長時間才回來，原來是因為細心地買了這麼多貼心的用品。

 

這男生買的這條牛仔褲出奇地合穿，Katie疑惑：「佢點解可以睇穿我嘅size？點解佢可以買M巾底褲完全零尷尬？係咪佢成日幫阿媽買M巾？屋企有幾個家姐細妹？定係畀女友調校到咁識體貼人？」

 

當Katie步出洗手間，她很想解開剛才腦中出現的疑問。

 

至少，跟他說句多謝吧。

 

只是，男生已經消失在她的視線範圍。她在canteen繞了幾個圈，已經不見了男生的蹤影。

 

每日返學，Katie都會想起「救命恩人」。不過，這個如此貼心的男生，此後再沒有在Katie的眼前再次出現。

 

 

 

作者：陸敏而
人人故事皆如是，如有雷同，實屬巧合。（完）

-----------------------------------------------------------------------------------------------------

👍Lifenewshk編輯私心推介Whatsapp Group！

LifenewshHK吃喝玩樂推介😈
https://chat.whatsapp.com/Bbt5mYYkxdi6pGDe0pQBjw

香港好去處優惠推介😈
https://chat.whatsapp.com/KZHQduUSuf72JX6dLy5K52