【觀塘懷舊日式cafe】進入昭和時代 嘆現代西洋及日式美食!

 

 

喺觀塘工廈一個唔起眼嘅角落，隱藏一個充滿昭和年代特式嘅日式cafe。TORIO喫茶部除咗有日式餐點外，更有幾種唔同口味嘅意粉、吐司、沙律同甜品供應。同幾個朋友一齊去嘆個下午茶，一路聽住黑膠碟，一路同朋友傾計，真係特別有feel！

呢個牛油果雜菜沙律拼日替薯泥啱晒啲想食個健康下午茶嘅女士！擺盤有心機之餘，份量又啱啱好，唔會太多食唔晒，又唔怕淨係食沙律唔飽。配搭亦都十分特別，有埋西柚配個沙律，整體感覺好清新，好啱喺呢啲咁熱嘅天氣食。

黑松露蟹肉意粉好creamy，有黑松露嘅香味但又唔會過濃，再加上蟹肉嘅鮮甜味，成個配搭都好出色。有啲蟹籽用嚟裝飾外，仲幫呢個意粉增加咗脆卜卜嘅口感。呢個係白汁意粉但完全唔會太膩，令人想一口接一口。

除咗食物，佢哋都有好多飲品選擇，有梳打、茶、咖啡同佢哋特製嘅Jelly Punch。小編就揀咗榛子咖啡，咖啡好香榛子味，奶泡十分幼滑，仲要有靚靚拉花，用嚟影相打卡一流！

TORIO喫茶部

觀塘興業街16-18號美興工業大廈A座1樓4室