【信任生活】 《有時候不信任，代表住一種友誼》

 

對於大家嚟講，點樣先叫做一段好嘅友誼？

大家互相幫忙互相照顧先叫好朋友？

有靚女一齊望等於好兄弟？

喺一間房仔入面開心事台就係好閨蜜？

Nonono，少年你太天真了。

喺我心目中世界係好黑暗，

例如對於我嚟講，

有時候兩個人之間存在不信任，先叫做真朋友。

-

今日係我朋友生日，

我哋約咗1點鐘喺旺角等。

但1點鐘嘅時候，我先施施然喺屋企換衫。

呀妹：「喂你咁衰嘅約咗人哋1點鐘到旺角但你而家仲喺屋企！」

我：「No，你太過相信我朋友。

就係因為我太熟佢，所以我唔信佢會準時。」

我攞起電話，打開對話框。

我：「你見唔見到佢寫住：『換緊衫』？

換緊衫，即係仲喺床。

落咗樓，即係啱啱起身。

上咗車，即係啱啱落樓。

而呢句轉個彎就到，佢係指至少轉埋個淺水灣先到。

識咗咁多年，唔通仲信佢會準時咩？

而就係因為同佢太Friend，所以先唔會信。

呢一種複雜嘅關係，你大個就會明。」

講完呢句，我就背負住唏噓嘅背影離開咗屋企。

-

2點鐘，烈日當空。

足足遲咗1個鐘，我先至出現喺旺角。

老實講，心情喺呢一刻係有啲暢快，

因為平時等條友等咁耐，

今次到仲唔到佢等我？

今次佢仲唔等到身水身汗？

遲到先係贏家，遲到先係新世界嘅神！哈哈哈哈哈！

OK，我太傻豬。

因為我估唔到個八婆2點半先到。

-

朋友：「喂喂喂，做咩咁準時，你明知我會遲！」

我：「其實...我已經兩點先到...」

朋友：「係囉！兩點！咪太早囉！」

我：「今日你生日，我只係希望...你以後生生性性。」

講完之後，我送咗隻鐵達時畀佢。

朋友：「吓？你送錶畀我？你明知我唔睇錶，你明知我唔會準時。」

我：「送錶畀你唔係想你睇錶唔係想你準時。」

朋友：「咁你送錶畀我做咩？」

我：「我淨係想你睇下隻錶面後4隻字......」

朋友：「地久天長？你唔係咁老土想話我哋會Friend到地久天長呀？好Old School呀你！」

我：「唔係...」

朋友：「咁點解？」

我：「我係想話，

我人生等你呢個八婆嘅時間加加埋埋係地久天長。

希望下世唔使再等你。」

-

故事完結。

其實我想講嘅好簡單，

我太熟悉我朋友，所以我對佢不信任。

但正正因為不信任都同佢做朋友唔嫌棄佢啲缺點，

就更加知道我同佢有幾Friend。

唔知大家身邊又有冇呢啲不信任嘅好朋友呢？

撰文：90KG的文青