【飲食生活】 五大劣食!你又試過幾多樣?
相信近排大家都睇過嗰嚿隔離營嘅粟米午餐肉磚(?),呢嚿嘢不禁令小編諗返起咁多年聽過,又或者親身試過嘅劣食!今日就同大家講下香港有史以嚟嘅劣食啦!
1.明將
講起劣食,點可以唔提劣食界嘅老宗師明將!而家新一代未必識佢,但80後90後一定食過明將!千祈唔好以為佢係劣食咁簡單,佢仲要相當有創意!當中包括啫喱壽司、極似嘔吐物嘅紅豆軍艦,真係諗起都反胃!而除咗呢啲超有創意嘅壽司,佢嗰啲熱嘅壽司飯,同埋暖嘅三文魚都係唔可以睇小!
2.沙示
沙示係以植物Sarsaparilla(墨西哥菝葜)為主要調味,因此得名。沙示到底係咩味?到而家我都唔識形容,就係飲落有一種藥水味,再有一種類似藥油味嘅感覺!不過呢樣嘢就好兩極嘅,我都聽過有啲人係鍾意飲沙示,而聽講佢仲可以利尿促汗,幾健康㗎!
3.金幣朱古力
有邊個細路唔鍾意食朱古力?想當年細細個拜年見到有金幣朱古力梗係即刻攞嚟食!但我唔明,點解同樣都係朱古力,金幣朱古力可以難食到咁?除咗一陣甜味之外,佢仲散發住一股唔應該係食物嘅味道,感覺就好似食咗嚿皂咁食完要即刻沖口!
4.鹹金棗
想唔想食屎?唔係鬧你,係講緊鼻屎糖!其實我就一向都好怕食涼果,但鹹金棗係除咗難食之外個樣都非常之衰,有名你叫鼻屎糖你都知佢有幾核突!不過話時話,唔知大家有冇發覺而家愈嚟愈少人食呢類零食?
5.嘉頓雜餅
傳說中嘅五餅二魚,入面嘅餅就係嘉頓嘅餅!其實嘉頓餅一啲都唔難食,有時肚餓食幾塊仲可以頂下肚。不過,佢嘅劣係嚟自於佢嘅量,每年新年收到大量嘅嘉頓雜餅都係唔少人嘅惡夢,仲話瞓教都夢見到佢!我諗佢都唯一一款唔難食,但又畀人標籤為劣食嘅食物!
唔知大家仲有冇食過咩劣食呢?不如一齊分享下啦!

Leave a Comment