【設計生活】在香港做設計師,是靠著什麼成功的?









「香港智營設計大賞」2021(「智營大賞」)頒獎禮早前順利舉行,表揚64件優秀嘅原創設計。首先要恭喜眾多本地設計師獲獎,雖然今年度係「疫情年」,但都無阻一眾有心嘅設計師提交超班嘅作品,發揮創意!今次嘅提案就想探討下,究竟呢班得獎香港設計師,一直以嚟相信住乜嘢,而獲得今日嘅成功呢?

黃頌行先生(Thomas Wong),樂在棋中社會企業有限公司創辦人,憑「叮叮」香港電車作品獲得公司組別-傳統玩具-金獎

黃先生做社工出身,一直以嚟都覺得香港家長好需要一啲更有益嘅玩具,作為電子器材嘅替代品。「叮叮」香港電車只係佢其中一個優秀桌遊作品,佢好希望今次活動可以令更多人知道,原來香港都有好多好出色嘅設計,提供俾不同需要嘅消費者。

作為一個設計師,佢認為一定要信任自己嘅直覺。一名設計師嘅感覺往往係第一樣嘢領導佢去設計產品,例如好似佢嘅桌遊設計,靈感都係嚟自佢同自己仔女玩緊嘅時候。直覺話俾佢知,呢樣嘢會對小朋友好有意義,咁佢就會嘗試喺桌遊嘅主題上發揮創意喇,最後又真係喺市場上獲得好多爸爸媽媽嘅共鳴。

黃雋溢先生(Westley Wong ),圓融設計事務所創作總監,同拍檔Felix,憑「貳」作品獲得公司組別-家居佈置及植物護理-金獎

Westley年紀輕輕就喺香港創業,咁啱遇上社會運動同疫情,或者好多公司都選擇以防守嘅方法去營運,但黃先生偏偏就要構思一啲更創新更有挑戰性嘅計劃嚟做,呢個時候,隨著Felix嘅加入,大家都合作得好順利,一直發展到今日獲得殊榮嘅好日子。

信任團隊係Westley做設計嘅宗旨,佢認為一個好嘅作品,唔能夠單靠一人之境,但一班合作火花大嘅團隊就可以帶嚟更多可能性。佢覺得一個人識嘅嘢係有限嘅,但現實好多設計師都係單打獨鬥,導致設計工作可能會走向兩種極端,一係會自滿,一係就會自卑,兩者最後都會漸漸失去競爭力,但原來只要大家一齊合作或者交流下,就可以創造更多事物出嚟,所以佢話在場好多設計師都係大家嘅盟友。


Jason Wong,Departure創辦人,憑iPhone出行無線充電套裝獲得公司組別-優閒及旅遊-金獎

Jason同樣係同幾個設計師朋友喺香港一齊創業,本來想由打工仔嘅身份變成實踐理想嘅老闆,估唔到當所有嘢都準備好曬嘅時候,疫情話嚟就嚟......佢哋當時都好擔心,好怕巡唔到廠,好怕封關。

不過Jason正正因為信任逆境,身邊嘅朋友都懷疑盤生意仲開唔開得成,佢就繼續喺逆境中堅持自己計劃好嘅事。可能係呢份強大嘅信心,幾位設計師漸漸發現原來喺呢個時候,好多廠都冇生意,所以就算佢哋嘅單比較細,工廠都一一接收。原來就算係逆境,都有好多機會。同時Jason都好感謝香港出口商會提供一個咁好嘅機會表揚眾多設計師,令更多人認識到香港設計。


就算喺香港做設計師慘過食poo poo,都總會有班有心人願意去做,願意去相信,希望有一日,大家都會信任香港嘅設計師,可以衝出國際。

















沒有留言

由 Blogger 提供.