【酒鬼注意】 銅鑼灣摩登中菜推斷片餐 八道佳餚以烈酒入饌！

 

位於銅鑼灣利園三期嘅DUCKEE係一間鐘意將傳統同現代菜式結合，創意同驚喜十足嘅中菜餐廳，佢地今次為一班無酒不歡嘅人設計咗共有八道菜嘅「淂記斷片餐」，每道菜都用上唔同嘅烈酒入饌，例如大家都好熟悉嘅高梁酒、威士忌同二十年花雕酒等等。

唔少人同朋友食飯之前都習慣乾杯先，DUCKEE就為大家安排咗一個用中國茶葉作基調嘅開胃雞尾酒，仲特登用咗葫蘆去裝住啲酒，打卡就啱晒！雞尾酒味道好清新，好開胃。

前菜有「醉困微醮失衫鴨」、「頭搖尾擺大蝦球」同「面紅耳熱醉鮑魚」，最令小編印象深刻就係「面紅耳熱醉鮑魚」。原隻鮑魚用左花雕酒去浸泡，質地腍，易入口，花雕酒嘅酒香喺口腔縈繞。呢道菜特別之處係浸泡鮑魚嘅花雕係可以當酒咁飲！除左有花雕酒，仲有其他調味加持，飲落去係一杯濃郁版嘅花雕酒。

主菜除咗有用啤酒煮到入味嘅「酩酊大醉啤啤鴨」配一杯凍冰冰嘅啤酒，仲有「不醒人事東坡肉」。東坡肉用上威士忌去烹調，濃濃嘅威士忌香再加上炆至軟腍嘅肉，令人食過返尋味。小編到而家都仲回味緊道東坡肉有幾咁好食！再配上一杯日本知多威士忌，食到呢道菜，小編都開始有啲醉意。

「土蛋不服油麥菜」係用高梁酒去煮，食落真係好特別，每條菜都有淡淡酒味同雞蛋香，亦都開咗小編眼界，冇諗過可以將酒加落菜度煮。另一道「頭昏腦漲小籠包」入面灌嘅並唔係高湯，而係女兒紅，酒並冇遮蓋肉嘅味道反而帶出左豬肉本身嘅鮮甜。

最後用加入國窖白酒做成嘅「大燻迷桂花拉糕」為呢餐畫上一個完美又充滿醉意嘅句號，桂花糕嘅桂花香撲鼻而來，未放入口都已經可以幻想到佢食入口會有幾香，果然都冇令小編失望，桂花清香，又唔會過甜過膩，食完咁多重口味嘅菜式可以有助解膩。

「淂記斷片餐」供四人享用，價錢為$1,952，供應到六月三十日，星期一至三去食仲會有額外88折優惠 （公眾假期除外）。各位酒鬼要食就記得快啲打電話去訂位啦！

DUCKEE

地址：香港銅鑼灣新寧道一號利園三期地庫 B01-B10 號舖

電話：3105 1252

營業時間：星期一至日 上午 11 時 30 分至晚上 10 時

由於受疫情影響 餐廳營業時間將不定時更改 敬請留意

訂座：https://www.sevenrooms.com/reservations/duckeehongkong