【信任生活】《每一個人，都係想有一個好似花姐咁嘅朋友。》

 

大家有冇發現，呢期最紅嘅人物，唔係Mirror或者Error，而係佢哋背後嘅女人，花姐。

花姐係咪一個好嘅經理人？佢係咪一個好監製？每個人有唔同答案。但我相信，花姐一定會係一個好好嘅朋友。

講返保錡件事，被爆出同沙律一齊咗之後，佢畀人話原來佢一腳踏兩船，後期佢仲喺IG Live度失控爆粗鬧網民。之後好多網民要求保錡退出Error，退出娛樂圈，要佢永不翻身。

如果保錡喺TVB，咁件事會點？唔使問，雪藏，雪藏，再雪藏。

不過，保錡係喺Viu。花姐喺呢個時候，唔單止冇雪到佢，仲對住傳媒講：「我從來冇諗過要放棄保錡。」

相信大家都好好奇，點解花姐仲要死攬住保錡？咁就要由花姐同保錡嘅邂逅，《全民造星》開始講起喇。

當年保錡畀人笑佢似八兩金，後來喺比賽裡面表現麻麻，情緒亦非常唔穩定，仲對住鏡頭喊住講佢畀女飛......當時一往情深又慘被戴綠帽嘅佢，得到好多人嘅同情，開始唔再笑佢，反而係鼓勵佢。後來佢跟肥仔出道，成立咗Error，表現都係平平穩穩，直到喺《花姐Error遊》入面，製作組叫佢食咩都肯制，憑住絕招「快吞轟」而吸咗好多粉絲，之後，佢都慢慢推出自己同其他音樂人合作嘅作品，開始畀人睇到佢嘅才華同能力。

以上所有嘢，相信花姐都有放在眼內，所以當有記者問到有關保錡嘅事嘅時候，佢道出自己對保錡抱有好大嘅信任，佢知道保錡嘅性格，做錯咗就會認錯兼肯改正。花姐話：「保錡係有唔啱嘅時候，但係點樣做錯事都好，我地都應該原諒一個善良嘅人，原諒一個肯努力嘅人。」

而亦都係因為呢份信任，花姐唔介意背負住網民嘅壓力去死攬保錡。所以，就係呢份信任，我肯定花姐會係一個好好嘅朋友。人生，大概都係想搵到好似花姐咁嘅人做知己。

(題外話，近期嘅Error自肥企畫播出，口碑相當之好。睇完保錡嘅表現，你又會唔會原諒佢呢？一齊討論下啦！)