【信任生活】 《做父母要考牌，做仔女，就要幫父母考呢個牌》

 

如果做父母真係要考牌，最難考嘅試題一定係：相信自己嘅仔女。

我今年22歲，Fresh Grad，理應係一個已經識得自理嘅成年人。

不過，喺我父母心目中，我都只係一個小朋友。

例如，每次去到月尾嘅時候，佢哋都會擔心我唔夠錢用要慳住慳住。

例如，每次OT嘅時候，佢哋都會覺得我畀公司刻薄，覺得我好辛苦。

例如，我拍拖，佢哋會好擔心，因為世界上所有嘅男人都係想呃佢個女。

其實我都已經咁大個人，點解佢哋唔相信我識得處理呢啲事？

如果信任係父母考牌嘅必要條件，咁今次我爸爸媽媽一定考唔到呢個牌。

不過，點解父母會唔信我？點解佢哋唔放手畀我自己搞掂晒所有嘢？

諗諗下，其實個主要原因都係我。

唔係我太幼稚唔識Handle所有嘢，而係我冇話過畀佢哋知其實我Handle到。

如果我一早同佢講我搵幾錢人工，佢哋仲會唔會擔心我唔夠錢使？

如果我同佢哋講我OT係做緊啲自己好Enjoy做嘅工作，佢哋仲會唔會覺得公司刻薄我？

如果我拍拖帶埋個男朋友畀佢哋見，等佢哋知道男朋友有幾好，佢哋仲會唔會覺得男朋友係想呃我？

一句到尾，都係因為我哋嘅溝通唔夠，所以先會導致佢哋唔夠信任我。

如果我一早肯同佢哋講多啲，佢哋就唔使咁擔心。

換句話講，做父母要考牌嘅話，除咗佢哋自己要付出之外，每個仔女都應該要多啲同父母講多啲等佢哋了解自己，協助佢哋考呢個牌。

甚或至，喺我心目中做一個乖仔乖女都要考牌。

我學識咗喇，而家做緊一個P牌乖女。

趁住呢個母親節，不如你都多啲同媽媽傾下計，等佢了解你多啲，幫佢考好呢個媽媽牌？

撰文：小編S