【單車初體驗！】將軍澳寶琳單車徑好玩！租單車3大留意要點！

夏天自然是為小朋友放電的好日子，將軍澳多單車徑，去踩單車算是一流。見到不少KOL講過新都城一期有間單車舖，於是搵咗個星期日帶埋小食家Abby去踩單車啦！

第一次去，交通幾方便，喺寶琳站落咗車，基本上過一條馬路，沿住商場外圍向單車徑方向行，就會見到嗰間單車舖Biba QQ。

1. 收費按金及時租：
按金100蚊，一個鐘就40蚊，兩個鐘都係80蚊，算係好抵。好快手職員就安排咗一部有輔助轆嘅單車畀佢踩，初時都有少少碰碰跌跌，習慣咗平衡之後都踩得好快呀！

2. 事先嚴格檢查輔助轆及結構：
第二個星期諗住再去，不過呢部單車個輔助轆唔係幾啱位，靠咗左傾，本身都有問過佢哋部車有啲唔平，職員又堅稱無問題，仲話一定係咁。小朋友又心急去玩，我哋就畀佢去踩，結果Abby發現部車好難控制，踩兩下就會偏離方向，好快就跌咗兩次，好彩我哋喺佢身邊即刻扶住佢，唔駛跌得咁傷。結果唔夠十分鐘就折返，我哋建議大家事先必須檢查清楚，收車覺得有問題就唔好踩，否則錢又要畀氣又要受呀！

3. 早啲去租多啲車揀：
我哋要求換過一部車，佢哋又話租晒出去，得番呢部，咁好明顯呢部就係本身唔得，係賣剩蔗嚟，我哋兩次去都係下晝兩點幾。據職員所講，應該要朝早時間嚟應該會多啲單車揀，講真你信唔信就見人見智啦。合共耗花半個鐘，佢哋收足一個鐘錢。咁大家記得早啲去啦，唔好好似我哋咁啦。

沿路鳥語花香，都算唔錯呢。

嘩，做乜踩到咁快一枝箭咁！

間舖開喺單車徑隔離真係正呀！

更多海嵐航空趣聞：
https://www.facebook.com/abbycheunghk