《OT嚟講，乜嘢係最重要？》

 

《OT嚟講，乜嘢係最重要？》

「今晚11點，你會做啲咩？」做啲咩？每次諗起呢句對白我都會好嬲！OT緊呀趕緊Project呀仲問！不過我又想問下大家，OT嚟講，乜嘢先係最重要，令你條氣Gur啲呢？

 

相信去到呢度，十個有九個都係會答：補水。我上司曾經講過，雖然睇落去每個月就好似有唔錯嘅收入，但計埋OT嘅時數，其實佢嘅時薪唔係真係咁高。每日至少返12個鐘，仲要放工得嗰少少交通津貼，其實真係蝕住做。所以補下水，唔使你Double人工，已經好開心。(不過做得廣告呢行，OT冇補水都係預咗......係時候要爭取下)

 

除咗補水之外，一個好嘅晚餐都好重要。即係如果你做咗成日嘢，結果OT嘅時候淨係食杯麵，當下嘅心情會非常肉酸。以前喺舊公司試過有一次做到好夜，Claim公司錢叫咗個大約70幾蚊嘅飯，結果畀公司問我做咩叫咁貴。我記得冇幾耐就辭咗職，因為我接受唔到咁辛苦冇補水OT食70蚊嘅飯都要畀人照肺。

 

但係，除咗補水，除咗有好嘢食，除咗有津貼，仲有啲咩係好重要？

 

嗰日做到凌晨一點幾，第二朝返工見到枱面多咗一筒維多C。

 

我仲好扮風趣咁話：「嘩邊個對我咁好想溝我？」

 

結果我老細就話：「我仔都生埋，買佢畀你斷估唔係想溝你掛？」

 

我即刻嚇一嚇，唔係因為怕佢有咩企圖，而係因為覺得無事獻殷勤非姦即盜！

 

佢講：「知道你哋成條Team近排成日做到好夜，咪去買啲維多C畀你哋打下底，廢事你哋病呀！等你哋忙完再請你哋食餐飯啦！」

 

嗰一刻，我知道OT最重要嘅係咩。

 

最重要嘅，唔係補水，唔係Allowance，

而係，

有人知道自己付出緊。

 

係呀，其實做嘢有人睇到係好重要。唔好扮清高，話咩「我做嘢唔使畀人知」，因為冇人知嘅勤力，就係白費氣力。有人明白自己嘅價值，知道自己畀咗啲咩呢間公司，真係好重要。就算OT做身體唔健康，聽到佢呢句說話個心都會健康啲。

 

飲住呢杯維多C，我都幾開心我老細認可我嘅努力，

不過，認可還認可，不如你都考慮下加我人工，OK？