【好想要的Jojo】只要她發現別人有而她沒有的，她就特別想得到......

 

「好想要！好想要！」

Jojo用力抓住男友的胳膊，聽到她連聲「鼓勵」，男友的表現也特別賣力。

今日是Jojo生日，她得到酒店staycation燭光晚餐慶祝，還有她最喜歡的手袋做生日禮物。

好多人都試過，見到一樣事/物好想擁有，然後千方百計要等到手，Jojo就是這種人。

「好想要」幾乎是Jojo的口頭禪，只要她發現別人有而她沒有的，她就特別想得到。唯一不同的是，十幾歲時想要的是銀包，現在想要的是手袋，價錢爭幾倍。

兩個月後。

「你睇下你睇下！個袋超靚喎！」Jojo指着櫥窗內的D字頭手袋：「尋日見老闆個秘書揹住，佢瞄到我望住佢個袋，個樣得戚到！」她邊說邊向男朋友撒嬌，暗示想買。

「上個月先買咗個C字頭手袋畀妳做生日禮物，而家又話想要？成個月人工喎。」

「唓！又冇話叫你買，我真係想要喎。」

到底Jojo是見到人哋有又想要，還是自己真的想要？可能，她也未必分得清。

星期六下晝，Jojo男友約了兄弟踢波，Jojo於是約閨密Eva去新開的cafe下午茶兼打卡。

「妳根本就唔明，呢啲唔係奢侈品，係生活必須品。冇咗佢，生活暗淡無光。」在一桌精緻的英式下午茶點心面前，Jojo向Eva發表偉倫。

「D字頭今年出嘅新袋款，出年揹出嚟就out啦，佢又肯買畀妳？」

「妳覺得出年out啫，我冇咁講喎。」

「妳見老闆個秘書揹個新袋，到時又想要新款啦！」

「但係我真係好想要喎。」

「又係呢句，妳成日喺條仔面前話想要，想要，妳想要個袋，佢以為妳有性需要囉。」

Jojo剛吞下一口牛油鬆餅：「佢次次聽到我話想要都特別興𡚒，其實係佢開心時我又開心，咁唔好咩？」

Eva望着Jojo，也不知道Jojo這個問題，是否需要她給出一個答案。二人繼續吃着三層high tea架上的甜品。

感謝咀嚼的需要，拯救了二人無語的尷尬氣氛。

城市中有多少情侶，每日在誤會當中互相依戀，我們數得清嗎？

或者有些誤會，是不需解釋的。

（完）

*人人故事皆如是，如有雷同，實屬巧合。

作者簡介

陸敏而